(BHSCO) Proverbs 2 : 1 בני אם־תקח אמרי ומצותי תצפן אתך׃
(BHSCO) Proverbs 2 : 2 להקשיב לחכמה אזנך תטה לבך לתבונה׃
(BHSCO) Proverbs 2 : 3 כי אם לבינה תקרא לתבונה תתן קולך׃
(BHSCO) Proverbs 2 : 4 אם־תבקשנה ככסף וכמטמונים תחפשנה׃
(BHSCO) Proverbs 2 : 5 אז תבין יראת יהוה ודעת אלהים תמצא׃
(BHSCO) Proverbs 2 : 6 כי־יהוה יתן חכמה מפיו דעת ותבונה׃
(BHSCO) Proverbs 2 : 7 [כ וצפן] [ק יצפן] לישרים תושיה מגן להלכי תם׃
(BHSCO) Proverbs 2 : 8 לנצר ארחות משפט ודרך [כ חסידו] [ק חסידיו] ישמר׃
(BHSCO) Proverbs 2 : 9 אז תבין צדק ומשפט ומישרים כל־מעגל־טוב׃
(BHSCO) Proverbs 2 : 10 כי־תבוא חכמה בלבך ודעת לנפשך ינעם׃
(BHSCO) Proverbs 2 : 11 מזמה תשמר עליך תבונה תנצרכה׃
(BHSCO) Proverbs 2 : 12 להצילך מדרך רע מאיש מדבר תהפכות׃
(BHSCO) Proverbs 2 : 13 העזבים ארחות ישר ללכת בדרכי־חשך׃
(BHSCO) Proverbs 2 : 14 השמחים לעשות רע יגילו בתהפכות רע׃
(BHSCO) Proverbs 2 : 15 אשר ארחתיהם עקשים ונלוזים במעגלותם׃
(BHSCO) Proverbs 2 : 16 להצילך מאשה זרה מנכריה אמריה החליקה׃
(BHSCO) Proverbs 2 : 17 העזבת אלוף נעוריה ואת־ברית אלהיה שכחה׃
(BHSCO) Proverbs 2 : 18 כי שחה אל־מות ביתה ואל־רפאים מעגלתיה׃
(BHSCO) Proverbs 2 : 19 כל־באיה לא ישובון ולא־ישיגו ארחות חיים׃
(BHSCO) Proverbs 2 : 20 למען תלך בדרך טובים וארחות צדיקים תשמר׃
(BHSCO) Proverbs 2 : 21 כי־ישרים ישכנו־ארץ ותמימים יותרו בה׃
(BHSCO) Proverbs 2 : 22 ורשעים מארץ יכרתו ובוגדים יסחו ממנה׃ ף