(BHSCO) Proverbs 20 : 1 לץ היין המה שכר וכל־שגה בו לא יחכם׃
(BHSCO) Proverbs 20 : 2 נהם ככפיר אימת מלך מתעברו חוטא נפשו׃
(BHSCO) Proverbs 20 : 3 כבוד לאיש שבת מריב וכל־אויל יתגלע׃
(BHSCO) Proverbs 20 : 4 מחרף עצל לא־יחרש [כ ישאל] [ק ושאל] בקציר ואין׃
(BHSCO) Proverbs 20 : 5 מים עמקים עצה בלב־איש ואיש תבונה ידלנה׃
(BHSCO) Proverbs 20 : 6 רב־אדם יקרא איש חסדו ואיש אמונים מי ימצא׃
(BHSCO) Proverbs 20 : 7 מתהלך בתמו צדיק אשרי בניו אחריו׃
(BHSCO) Proverbs 20 : 8 מלך יושב על־כסא־דין מזרה בעיניו כל־רע׃
(BHSCO) Proverbs 20 : 9 מי־יאמר זכיתי לבי טהרתי מחטאתי׃
(BHSCO) Proverbs 20 : 10 אבן ואבן איפה ואיפה תועבת יהוה גם־שניהם׃
(BHSCO) Proverbs 20 : 11 גם במעלליו יתנכר־נער אם־זך ואם־ישר פעלו׃
(BHSCO) Proverbs 20 : 12 אזן שמעת* ועין ראה יהוה עשה גם־שניהם׃
(BHSCO) Proverbs 20 : 13 אל־תאהב שנה פן־תורש פקח עיניך שבע־לחם׃
(BHSCO) Proverbs 20 : 14 רע רע יאמר הקונה ואזל לו אז יתהלל׃
(BHSCO) Proverbs 20 : 15 יש זהב ורב־פנינים וכלי יקר שפתי־דעת׃
(BHSCO) Proverbs 20 : 16 לקח־בגדו כי־ערב זר ובעד [כ נכרים] [ק נכריה] חבלהו׃
(BHSCO) Proverbs 20 : 17 ערב לאיש לחם שקר ואחר ימלא־פיהו חץץ׃
(BHSCO) Proverbs 20 : 18 מחשבות בעצה תכון ובתחבלות עשה מלחמה׃
(BHSCO) Proverbs 20 : 19 גולה־סוד* הולך רכיל ולפתה שפתיו לא תתערב׃
(BHSCO) Proverbs 20 : 20 מקלל אביו ואמו ידעך נרו [כ באישון] [ק באשון] חשך׃
(BHSCO) Proverbs 20 : 21 נחלה [כ מבחלת] [ק מבהלת] בראשנה ואחריתה לא תברך׃
(BHSCO) Proverbs 20 : 22 אל־תאמר אשלמה־רע קוה ליהוה וישע לך׃
(BHSCO) Proverbs 20 : 23 תועבת יהוה אבן ואבן ומאזני מרמה לא־טוב׃
(BHSCO) Proverbs 20 : 24 מיהוה מצעדי־גבר ואדם מה־יבין דרכו׃
(BHSCO) Proverbs 20 : 25 מוקש אדם ילע קדש ואחר נדרים לבקר׃
(BHSCO) Proverbs 20 : 26 מזרה רשעים מלך חכם וישב עליהם אופן׃
(BHSCO) Proverbs 20 : 27 נר יהוה נשמת אדם חפש כל־חדרי־בטן׃
(BHSCO) Proverbs 20 : 28 חסד ואמת יצרו־מלך וסעד בחסד כסאו׃
(BHSCO) Proverbs 20 : 29 תפארת בחורים כחם והדר זקנים שיבה׃
(BHSCO) Proverbs 20 : 30 חברות פצע [כ תמריק] [ק תמרוק] ברע ומכות חדרי־בטן׃