(BHSCO) Proverbs 29 : 1 איש תוכחות מקשה־ערף פתע ישבר ואין מרפא׃
(BHSCO) Proverbs 29 : 2 ברבות צדיקים ישמח העם ובמשל רשע יאנח עם׃
(BHSCO) Proverbs 29 : 3 איש־אהב חכמה ישמח אביו ורעה זונות יאבד־הון׃
(BHSCO) Proverbs 29 : 4 מלך במשפט יעמיד ארץ ואיש תרומות יהרסנה׃
(BHSCO) Proverbs 29 : 5 גבר מחליק על־רעהו רשת פורש על־פעמיו׃
(BHSCO) Proverbs 29 : 6 בפשע איש רע מוקש וצדיק ירון ושמח׃
(BHSCO) Proverbs 29 : 7 ידע צדיק דין דלים רשע לא־יבין דעת׃
(BHSCO) Proverbs 29 : 8 אנשי לצון יפיחו קריה וחכמים ישיבו אף׃
(BHSCO) Proverbs 29 : 9 איש־חכם נשפט את־איש אויל ורגז ושחק ואין נחת׃
(BHSCO) Proverbs 29 : 10 אנשי דמים ישנאו־תם וישרים יבקשו נפשו׃
(BHSCO) Proverbs 29 : 11 כל־רוחו יוציא כסיל וחכם באחור ישבחנה׃
(BHSCO) Proverbs 29 : 12 משל מקשיב על־דבר־שקר כל־משרתיו רשעים׃
(BHSCO) Proverbs 29 : 13 רש ואיש תככים נפגשו מאיר־עיני שניהם יהוה׃
(BHSCO) Proverbs 29 : 14 מלך שופט באמת דלים כסאו לעד יכון׃
(BHSCO) Proverbs 29 : 15 שבט ותוכחת יתן חכמה ונער משלח מביש אמו׃
(BHSCO) Proverbs 29 : 16 ברבות רשעים ירבה־פשע וצדיקים במפלתם יראו׃
(BHSCO) Proverbs 29 : 17 יסר בנך ויניחך ויתן מעדנים לנפשך׃ ף
(BHSCO) Proverbs 29 : 18 באין חזון יפרע עם ושמר תורה אשרהו׃
(BHSCO) Proverbs 29 : 19 בדברים לא־יוסר עבד כי־יבין ואין מענה׃
(BHSCO) Proverbs 29 : 20 חזית איש אץ בדבריו תקוה לכסיל ממנו׃
(BHSCO) Proverbs 29 : 21 מפנק מנער עבדו ואחריתו יהיה מנון׃
(BHSCO) Proverbs 29 : 22 איש־אף יגרה מדון ובעל חמה רב־פשע׃
(BHSCO) Proverbs 29 : 23 גאות אדם תשפילנו ושפל־רוח יתמך כבוד׃
(BHSCO) Proverbs 29 : 24 חולק עם־גנב שונא נפשו אלה ישמע ולא יגיד׃
(BHSCO) Proverbs 29 : 25 חרדת אדם יתן מוקש ובוטח ביהוה ישגב׃
(BHSCO) Proverbs 29 : 26 רבים מבקשים פני־מושל ומיהוה משפט־איש׃
(BHSCO) Proverbs 29 : 27 תועבת צדיקים איש עול ותועבת רשע ישר־דרך׃ ף