(BHSCO) 1 Chronicles 18 : 1 ויהי אחרי־כן ויך דויד את־פלשתים ויכניעם ויקח את־גת ובנתיה מיד פלשתים׃
(BHSCO) 1 Chronicles 18 : 2 ויך את־מואב ויהיו מואב עבדים לדויד נשאי מנחה׃
(BHSCO) 1 Chronicles 18 : 3 ויך דויד את־הדדעזר מלך־צובה חמתה בלכתו להציב ידו בנהר־פרת׃
(BHSCO) 1 Chronicles 18 : 4 וילכד דויד ממנו אלף רכב ושבעת אלפים פרשים ועשרים אלף איש רגלי ויעקר דויד את־כל־הרכב ויותר ממנו מאה רכב׃
(BHSCO) 1 Chronicles 18 : 5 ויבא ארם דרמשק לעזור להדדעזר מלך צובה ויך דויד בארם עשרים־ושנים אלף איש׃
(BHSCO) 1 Chronicles 18 : 6 וישם דויד בארם דרמשק ויהי ארם לדויד עבדים נשאי מנחה ויושע יהוה לדויד בכל אשר הלך׃
(BHSCO) 1 Chronicles 18 : 7 ויקח דויד את שלטי הזהב אשר היו על עבדי הדדעזר ויביאם ירושלם׃
(BHSCO) 1 Chronicles 18 : 8 ומטבחת ומכון ערי הדדעזר לקח דויד נחשת רבה מאד בה עשה שלמה את־ים הנחשת ואת־העמודים ואת כלי הנחשת׃ ף
(BHSCO) 1 Chronicles 18 : 9 וישמע תעו מלך חמת כי הכה דויד את־כל־חיל הדדעזר מלך־צובה׃
(BHSCO) 1 Chronicles 18 : 10 וישלח את־הדורם־בנו אל־המלך־דויד [כ לשאול] [ק לשאל]־לו לשלום ולברכו על אשר נלחם בהדדעזר ויכהו כי־איש מלחמות תעו היה הדדעזר וכל כלי זהב וכסף ונחשת׃
(BHSCO) 1 Chronicles 18 : 11 גם־אתם הקדיש המלך דויד ליהוה עם־הכסף והזהב אשר נשא מכל־הגוים מאדום וממואב ומבני עמון ומפלשתים ומעמלק׃
(BHSCO) 1 Chronicles 18 : 12 ואבשי בן־צרויה הכה את־אדום בגיא המלח שמונה עשר אלף׃
(BHSCO) 1 Chronicles 18 : 13 וישם באדום נציבים ויהיו כל־אדום עבדים לדויד ויושע יהוה את־דויד בכל אשר הלך׃
(BHSCO) 1 Chronicles 18 : 14 וימלך דויד על־כל־ישראל ויהי עשה משפט וצדקה לכל־עמו׃
(BHSCO) 1 Chronicles 18 : 15 ויואב בן־צרויה על־הצבא ויהושפט בן־אחילוד מזכיר׃
(BHSCO) 1 Chronicles 18 : 16 וצדוק בן־אחיטוב ואבימלך בן־אביתר כהנים ושושא סופר׃
(BHSCO) 1 Chronicles 18 : 17 ובניהו בן־יהוידע על־הכרתי והפלתי ובני־דויד הראשנים ליד המלך׃ ף