(BHSCO) Ezekiel 43 : 1 ויולכני אל־השער שער אשר פנה דרך הקדים׃
(BHSCO) Ezekiel 43 : 2 והנה כבוד אלהי ישראל בא מדרך הקדים וקולו כקול מים רבים והארץ האירה מכבדו׃
(BHSCO) Ezekiel 43 : 3 וכמראה המראה אשר ראיתי כמראה אשר־ראיתי בבאי לשחת את־העיר ומראות כמראה אשר ראיתי אל־נהר־כבר ואפל אל־פני׃
(BHSCO) Ezekiel 43 : 4 וכבוד יהוה בא אל־הבית דרך שער אשר פניו דרך הקדים׃
(BHSCO) Ezekiel 43 : 5 ותשאני רוח ותביאני אל־החצר הפנימי והנה מלא כבוד־יהוה הבית׃
(BHSCO) Ezekiel 43 : 6 ואשמע מדבר אלי מהבית ואיש היה עמד אצלי׃
(BHSCO) Ezekiel 43 : 7 ויאמר אלי בן־אדם את־מקום כסאי ואת־מקום כפות רגלי אשר אשכן־שם בתוך בני־ישראל לעולם ולא יטמאו עוד בית־ישראל שם קדשי המה ומלכיהם בזנותם ובפגרי מלכיהם במותם׃
(BHSCO) Ezekiel 43 : 8 בתתם ספם את־ספי ומזוזתם אצל מזוזתי והקיר ביני וביניהם וטמאו את־שם קדשי בתועבותם אשר עשו ואכל אתם באפי׃
(BHSCO) Ezekiel 43 : 9 עתה ירחקו את־זנותם ופגרי מלכיהם ממני ושכנתי בתוכם לעולם׃ ס
(BHSCO) Ezekiel 43 : 10 אתה בן־אדם הגד את־בית־ישראל את־הבית ויכלמו מעונותיהם ומדדו את־תכנית׃
(BHSCO) Ezekiel 43 : 11 ואם־נכלמו מכל אשר־עשו צורת הבית ותכונתו ומוצאיו ומובאיו וכל־צורתוק ואת כל־חקתיו וכל־[כ צורתי] [ק צורתיו] וכל־[כ תורתו] [ק תורתיו] הודע אותם וכתב לעיניהם וישמרו את־כל־צורתו ואת־כל־חקתיו ועשו אותם׃
(BHSCO) Ezekiel 43 : 12 זאת תורת הבית על־ראש ההר כל־גבלו סביב סביב קדש קדשים הנה־זאת תורת הבית׃
(BHSCO) Ezekiel 43 : 13 ואלה מדות המזבח באמות אמה אמה וטפח וחיק האמה ואמה־רחב וגבולה אל־שפתה סביב זרת האחד וזה גב המזבח׃
(BHSCO) Ezekiel 43 : 14 ומחיק הארץ עד־העזרה התחתונה שתים אמות ורחב אמה אחת ומהעזרה הקטנה עד־העזרה הגדולה ארבע אמות ורחב האמה׃
(BHSCO) Ezekiel 43 : 15 וההראל ארבע אמות [כ ומהאראיל] [ק ומהאריאל] ולמעלה הקרנות ארבע׃
(BHSCO) Ezekiel 43 : 16 [כ והאראיל] [ק והאריאל] שתים עשרה ארך בשתים עשרה רחב רבוע אל ארבעת רבעיו׃
(BHSCO) Ezekiel 43 : 17 והעזרה ארבע עשרה ארך בארבע עשרה רחב אל ארבעת רבעיה והגבול סביב אותה חצי האמה והחיק־לה אמה סביב ומעלתהו פנות קדים׃
(BHSCO) Ezekiel 43 : 18 ויאמר אלי בן־אדם כה אמר אדני יהוה אלה חקות המזבח ביום העשותו להעלות עליו עולה ולזרק עליו דם׃
(BHSCO) Ezekiel 43 : 19 ונתתה אל־הכהנים הלוים אשר הם מזרע צדוק הקרבים אלי נאם אדני יהוה לשרתני פר בן־בקר לחטאת׃
(BHSCO) Ezekiel 43 : 20 ולקחת מדמו ונתתה על־ארבע קרנתיו ואל־ארבע פנות העזרה ואל־הגבול סביב וחטאת אותו וכפרתהו׃
(BHSCO) Ezekiel 43 : 21 ולקחת את הפר החטאת ושרפו במפקד הבית מחוץ למקדש׃
(BHSCO) Ezekiel 43 : 22 וביום השני תקריב שעיר־עזים תמים לחטאת וחטאו את־המזבח כאשר חטאו בפר׃
(BHSCO) Ezekiel 43 : 23 בכלותך מחטא תקריב פר בן־בקר תמים ואיל מן־הצאן תמים׃
(BHSCO) Ezekiel 43 : 24 והקרבתם לפני יהוה והשליכו הכהנים עליהם מלח והעלו אותם עלה ליהוה׃
(BHSCO) Ezekiel 43 : 25 שבעת ימים תעשה שעיר־חטאת ליום ופר בן־בקר ואיל מן־הצאן תמימים יעשו׃
(BHSCO) Ezekiel 43 : 26 שבעת ימים יכפרו את־המזבח וטהרו אתו ומלאו [כ ידו] [ק ידיו]׃
(BHSCO) Ezekiel 43 : 27 ויכלו את־הימים ס והיה ביום השמיני והלאה יעשו הכהנים על־המזבח את־עולותיכם ואת־שלמיכם ורצאתי אתכם נאם אדני יהוה׃ ס