(BHSCO) Psalms 101 : 1 לדוד מזמור חסד־ומשפט אשירה לך יהוה אזמרה׃
(BHSCO) Psalms 101 : 2 אשכילה בדרך תמים מתי תבוא אלי אתהלך בתם־לבבי בקרב ביתי׃
(BHSCO) Psalms 101 : 3 לא־אשית לנגד עיני דבר־בליעל עשה־סטים שנאתי לא ידבק בי׃
(BHSCO) Psalms 101 : 4 לבב עקש יסור ממני רע לא אדע׃
(BHSCO) Psalms 101 : 5 [כ מלושני] [ק מלשני] בסתר רעהו אותו אצמית גבה־עינים ורחב לבב אתו לא אוכל׃
(BHSCO) Psalms 101 : 6 עיני בנאמני־ארץ לשבת עמדי הלך בדרך תמים הוא ישרתני׃
(BHSCO) Psalms 101 : 7 לא־ישב בקרב ביתי עשה רמיה דבר שקרים לא־יכון לנגד עיני׃
(BHSCO) Psalms 101 : 8 לבקרים אצמית כל־רשעי־ארץ להכרית מעיר־יהוה כל־פעלי און׃