BHSCO - Ps 140

(BHSCO) Psalms 140 : 1 למנצח מזמור לדוד׃ חלצני יהוה מאדם רע מאיש חמסים תנצרני׃

(BHSCO) Psalms 140 : 2 אשר חשבו רעות בלב כל־יום יגורו מלחמות׃

(BHSCO) Psalms 140 : 3 שננו לשונם כמו־נחש חמת עכשוב תחת שפתימו סלה׃

(BHSCO) Psalms 140 : 4 שמרני יהוה מידי רשע מאיש חמסים תנצרני אשר חשבו לדחות פעמי׃

(BHSCO) Psalms 140 : 5 טמנו־גאים פח לי וחבלים פרשו רשת ליד־מעגל מקשים שתו־לי סלה׃

(BHSCO) Psalms 140 : 6 אמרתי ליהוה אלי אתה האזינה יהוה קול תחנוני׃

(BHSCO) Psalms 140 : 7 יהוה אדני עז ישועתי סכתה לראשי ביום נשק׃

(BHSCO) Psalms 140 : 8 אל־תתן יהוה מאויי רשע זממו אל־תפק ירומו סלה׃

(BHSCO) Psalms 140 : 9 ראש מסבי עמל שפתימו [כ יכסומו] [ק יכסמו]׃*

(BHSCO) Psalms 140 : 10 [כ ימיטו] [ק ימוטו] עליהם גחלים באש יפלם במהמרות בל־יקומו׃

(BHSCO) Psalms 140 : 11 איש לשון בל־יכון בארץ איש־חמס רע יצודנו למדחפת׃

(BHSCO) Psalms 140 : 12 [כ ידעת] [ק ידעתי] כי־יעשה יהוה דין עני משפט אבינים׃

(BHSCO) Psalms 140 : 13 אך צדיקים יודו לשמך ישבו ישרים את־פניך׃