(BHSCO) Psalms 147 : 1 הללו יה כי־טוב זמרה אלהינו כי־נעים נאוה תהלה׃
(BHSCO) Psalms 147 : 2 בונה ירושלם יהוה נדחי ישראל יכנס׃
(BHSCO) Psalms 147 : 3 הרפא לשבורי לב ומחבש לעצבותם׃
(BHSCO) Psalms 147 : 4 מונה מספר לכוכבים לכלם שמות יקרא׃
(BHSCO) Psalms 147 : 5 גדול אדונינו ורב־כח לתבונתו אין מספר׃
(BHSCO) Psalms 147 : 6 מעודד ענוים יהוה משפיל רשעים עדי־ארץ׃
(BHSCO) Psalms 147 : 7 ענו ליהוה בתודה זמרו לאלהינו בכנור׃
(BHSCO) Psalms 147 : 8 המכסה שמים בעבים המכין לארץ מטר המצמיח הרים חציר׃
(BHSCO) Psalms 147 : 9 נותן לבהמה לחמה לבני ערב אשר יקראו׃
(BHSCO) Psalms 147 : 10 לא בגבורת הסוס יחפץ לא־בשוקי האיש ירצה׃
(BHSCO) Psalms 147 : 11 רוצה יהוה את־יראיו את־המיחלים לחסדו׃
(BHSCO) Psalms 147 : 12 שבחי ירושלם את־יהוה הללי אלהיך ציון׃
(BHSCO) Psalms 147 : 13 כי־חזק בריחי שעריך ברך בניך בקרבך׃
(BHSCO) Psalms 147 : 14 השם־גבולך שלום חלב חטים ישביעך׃
(BHSCO) Psalms 147 : 15 השלח אמרתו ארץ עד־מהרה ירוץ דברו׃
(BHSCO) Psalms 147 : 16 הנתן שלג כצמר כפור כאפר יפזר׃
(BHSCO) Psalms 147 : 17 משליך קרחו כפתים לפני קרתו מי יעמד׃
(BHSCO) Psalms 147 : 18 ישלח דברו וימסם ישב רוחו יזלו־מים׃
(BHSCO) Psalms 147 : 19 מגיד [כ דברו] [ק דבריו] ליעקב חקיו ומשפטיו לישראל׃
(BHSCO) Psalms 147 : 20 לא עשה כן לכל־גוי ומשפטים בל־ידעום הללו־יה׃