BHSCO - Ps 49

(BHSCO) Psalms 49 : 1 למנצח לבני־קרח מזמור׃ שמעו־זאת כל־העמים האזינו כל־ישבי חלד׃

(BHSCO) Psalms 49 : 2 גם־בני אדם גם־בני־איש יחד עשיר ואביון׃

(BHSCO) Psalms 49 : 3 פי ידבר חכמות והגות לבי תבונות׃

(BHSCO) Psalms 49 : 4 אטה למשל אזני אפתח בכנור חידתי׃

(BHSCO) Psalms 49 : 5 למה אירא בימי רע עון עקבי יסובני׃

(BHSCO) Psalms 49 : 6 הבטחים על־חילם וברב עשרם יתהללו׃

(BHSCO) Psalms 49 : 7 אח לא־פדה יפדה איש לא־יתן לאלהים כפרו׃

(BHSCO) Psalms 49 : 8 ויקר פדיון נפשם וחדל לעולם׃

(BHSCO) Psalms 49 : 9 ויחי־עוד לנצח לא יראה השחת׃

(BHSCO) Psalms 49 : 10 כי יראה חכמים ימותו יחד כסיל ובער יאבדו ועזבו לאחרים חילם׃

(BHSCO) Psalms 49 : 11 קרבם בתימו לעולם משכנתם לדר ודר קראו בשמותם עלי אדמות׃

(BHSCO) Psalms 49 : 12 ואדם ביקר בל־ילין נמשל כבהמות נדמו׃

(BHSCO) Psalms 49 : 13 זה דרכם כסל למו ואחריהם בפיהם ירצו סלה׃

(BHSCO) Psalms 49 : 14 כצאן לשאול שתו מות ירעם וירדו בם ישרים לבקר [כ וצירם] [ק וצורם] לבלות שאול מזבל לו׃

(BHSCO) Psalms 49 : 15 אך־אלהים יפדה נפשי מיד־שאול כי יקחני סלה׃

(BHSCO) Psalms 49 : 16 אל־תירא כי־יעשר איש כי־ירבה כבוד ביתו׃

(BHSCO) Psalms 49 : 17 כי לא במותו יקח הכל לא־ירד אחריו כבודו׃

(BHSCO) Psalms 49 : 18 כי־נפשו בחייו יברך ויודך כי־תיטיב לך׃

(BHSCO) Psalms 49 : 19 תבוא עד־דור אבותיו עד־נצח לא יראו־אור׃

(BHSCO) Psalms 49 : 20 אדם ביקר ולא יבין נמשל כבהמות נדמו׃