(BHSCO) Psalms 95 : 1 לכו נרננה ליהוה נריעה לצור ישענו׃
(BHSCO) Psalms 95 : 2 נקדמה פניו בתודה בזמרות נריע לו׃
(BHSCO) Psalms 95 : 3 כי אל גדול יהוה ומלך גדול על־כל־אלהים׃
(BHSCO) Psalms 95 : 4 אשר בידו מחקרי־ארץ ותועפות הרים לו׃
(BHSCO) Psalms 95 : 5 אשר־לו הים והוא עשהו ויבשת ידיו יצרו׃
(BHSCO) Psalms 95 : 6 באו נשתחוה ונכרעה נברכה לפני־יהוה עשנו׃
(BHSCO) Psalms 95 : 7 כי הוא אלהינו ואנחנו עם מרעיתו וצאן ידו היום אם־בקלו תשמעו׃
(BHSCO) Psalms 95 : 8 אל־תקשו לבבכם כמריבה כיום מסה במדבר׃
(BHSCO) Psalms 95 : 9 אשר נסוני אבותיכם בחנוני גם־ראו פעלי׃
(BHSCO) Psalms 95 : 10 ארבעים שנה אקוט בדור ואמר עם תעי לבב הם והם לא־ידעו דרכי׃
(BHSCO) Psalms 95 : 11 אשר־נשבעתי באפי אם־יבאון אל־מנוחתי׃