(BHSCO) Songs 1 : 1 שיר השירים אשר לשלמה׃
(BHSCO) Songs 1 : 2 ישקני מנשיקות פיהו כי־טובים דדיך מיין׃
(BHSCO) Songs 1 : 3 לריח שמניך טובים שמן תורק שמך על־כן עלמות אהבוך׃
(BHSCO) Songs 1 : 4 משכני אחריך נרוצה הביאני המלך חדריו נגילה ונשמחה בך נזכירה דדיך מיין מישרים אהבוך׃ ס
(BHSCO) Songs 1 : 5 שחורה אני ונאוה בנות ירושלם כאהלי קדר כיריעות שלמה׃
(BHSCO) Songs 1 : 6 אל־תראוני שאני שחרחרת ששזפתני השמש בני אמי נחרו־בי שמני נטרה את־הכרמים כרמי שלי לא נטרתי׃
(BHSCO) Songs 1 : 7 הגידה לי שאהבה נפשי איכה תרעה איכה תרביץ בצהרים שלמה אהיה כעטיה על עדרי חבריך׃
(BHSCO) Songs 1 : 8 אם־לא תדעי לך היפה בנשים צאי־לך בעקבי הצאן ורעי את־גדיתיך על משכנות הרעים׃ ס
(BHSCO) Songs 1 : 9 לססתי ברכבי פרעה דמיתיך רעיתי׃
(BHSCO) Songs 1 : 10 נאוו לחייך בתרים צוארך בחרוזים׃
(BHSCO) Songs 1 : 11 תורי זהב נעשה־לך עם נקדות הכסף׃
(BHSCO) Songs 1 : 12 עד־שהמלך במסבו נרדי נתן ריחו׃
(BHSCO) Songs 1 : 13 צרור המר דודי לי בין שדי ילין׃
(BHSCO) Songs 1 : 14 אשכל הכפר דודי לי בכרמי עין גדי׃ ס
(BHSCO) Songs 1 : 15 הנך יפה רעיתי הנך יפה עיניך יונים׃
(BHSCO) Songs 1 : 16 הנך יפה דודי אף נעים אף־ערשנו רעננה׃
(BHSCO) Songs 1 : 17 קרות בתינו ארזים [כ רחיטנו] [ק רהיטנו] ברותים׃