(BHSCO) 1 Kings 16 : 1 ויהי דבר־יהוה אל־יהוא בן־חנני על־בעשא לאמר׃
(BHSCO) 1 Kings 16 : 2 יען אשר הרימתיך מן־העפר ואתנך נגיד על עמי ישראל ותלך בדרך ירבעם ותחטא את־עמי ישראל להכעיסני בחטאתם׃
(BHSCO) 1 Kings 16 : 3 הנני מבעיר אחרי בעשא ואחרי ביתו ונתתי את־ביתך כבית ירבעם בן־נבט׃
(BHSCO) 1 Kings 16 : 4 המת לבעשא בעיר יאכלו הכלבים והמת לו בשדה יאכלו עוף השמים׃
(BHSCO) 1 Kings 16 : 5 ויתר דברי בעשא ואשר עשה וגבורתו הלא־הם כתובים על־ספר דברי הימים למלכי ישראל׃
(BHSCO) 1 Kings 16 : 6 וישכב בעשא עם־אבתיו ויקבר בתרצה וימלך אלה בנו תחתיו׃
(BHSCO) 1 Kings 16 : 7 וגם ביד־יהוא בן־חנני הנביא דבר־יהוה היה אל־בעשא ואל־ביתו ועל כל־הרעה אשר־עשה בעיני יהוה להכעיסו במעשה ידיו להיות כבית ירבעם ועל אשר־הכה אתו׃ ף
(BHSCO) 1 Kings 16 : 8 בשנת עשרים ושש שנה לאסא מלך יהודה מלך אלה בן־בעשא על־ישראל בתרצה שנתים׃
(BHSCO) 1 Kings 16 : 9 ויקשר עליו עבדו זמרי שר מחצית הרכב והוא בתרצה שתה שכור בית ארצא אשר על־הבית בתרצה׃
(BHSCO) 1 Kings 16 : 10 ויבא זמרי ויכהו וימיתהו בשנת עשרים ושבע לאסא מלך יהודה וימלך תחתיו׃
(BHSCO) 1 Kings 16 : 11 ויהי במלכו כשבתו על־כסאו הכה את־כל־בית בעשא לא־השאיר לו משתין בקיר וגאליו ורעהו׃
(BHSCO) 1 Kings 16 : 12 וישמד זמרי את כל־בית בעשא כדבר יהוה אשר דבר אל־בעשא ביד יהוא הנביא׃
(BHSCO) 1 Kings 16 : 13 אל כל־חטאות בעשא וחטאות אלה בנו אשר חטאו ואשר החטיאו את־ישראל להכעיס את־יהוה אלהי ישראל בהבליהם׃
(BHSCO) 1 Kings 16 : 14 ויתר דברי אלה וכל־אשר עשה הלוא־הם כתובים על־ספר דברי הימים למלכי ישראל׃ ף
(BHSCO) 1 Kings 16 : 15 בשנת עשרים ושבע שנה לאסא מלך יהודה מלך זמרי שבעת ימים בתרצה והעם חנים על־גבתון אשר לפלשתים׃
(BHSCO) 1 Kings 16 : 16 וישמע העם החנים לאמר קשר זמרי וגם הכה את־המלך וימלכו כל־ישראל את־עמרי שר־צבא על־ישראל ביום ההוא במחנה׃
(BHSCO) 1 Kings 16 : 17 ויעלה עמרי וכל־ישראל עמו מגבתון ויצרו על־תרצה׃
(BHSCO) 1 Kings 16 : 18 ויהי כראות זמרי כי־נלכדה העיר ויבא אל־ארמון בית־המלך וישרף עליו את־בית־מלך באש וימת׃
(BHSCO) 1 Kings 16 : 19 על־[כ חטאתו] [ק חטאתיו] אשר חטא לעשות הרע בעיני יהוה ללכת בדרך ירבעם ובחטאתו אשר עשה להחטיא את־ישראל׃
(BHSCO) 1 Kings 16 : 20 ויתר דברי זמרי וקשרו אשר קשר הלא־הם כתובים על־ספר דברי הימים למלכי ישראל׃ ף
(BHSCO) 1 Kings 16 : 21 אז יחלק העם ישראל לחצי חצי העם היה אחרי תבני בן־גינת להמליכו והחצי אחרי עמרי׃
(BHSCO) 1 Kings 16 : 22 ויחזק העם אשר אחרי עמרי את־העם אשר אחרי תבני בן־גינת וימת תבני וימלך עמרי׃ ף
(BHSCO) 1 Kings 16 : 23 בשנת שלשים ואחת שנה לאסא מלך יהודה מלך עמרי על־ישראל שתים עשרה שנה בתרצה מלך שש־שנים׃
(BHSCO) 1 Kings 16 : 24 ויקן את־ההר שמרון מאת שמר בככרים כסף ויבן את־ההר ויקרא את־שם העיר אשר בנה על שם־שמר אדני ההר שמרון׃
(BHSCO) 1 Kings 16 : 25 ויעשה עמרי הרע בעיני יהוה וירע מכל אשר לפניו׃
(BHSCO) 1 Kings 16 : 26 וילך בכל־דרך ירבעם בן־נבט [כ ובחטאתיו] [ק ובחטאתו] אשר החטיא את־ישראל להכעיס את־יהוה אלהי ישראל בהבליהם׃*
(BHSCO) 1 Kings 16 : 27 ויתר דברי עמרי אשר עשה וגבורתו אשר עשה הלא־הם כתובים על־ספר דברי הימים למלכי ישראל׃
(BHSCO) 1 Kings 16 : 28 וישכב עמרי עם־אבתיו ויקבר בשמרון וימלך אחאב בנו תחתיו׃ ף
(BHSCO) 1 Kings 16 : 29 ואחאב בן־עמרי מלך על־ישראל בשנת שלשים ושמנה שנה לאסא מלך יהודה וימלך אחאב בן־עמרי על־ישראל בשמרון עשרים ושתים שנה׃
(BHSCO) 1 Kings 16 : 30 ויעש אחאב בן־עמרי הרע בעיני יהוה מכל אשר לפניו׃
(BHSCO) 1 Kings 16 : 31 ויהי הנקל לכתו בחטאות ירבעם בן־נבט ויקח אשה את־איזבל בת־אתבעל מלך צידנים וילך ויעבד את־הבעל וישתחו לו׃
(BHSCO) 1 Kings 16 : 32 ויקם מזבח לבעל בית הבעל אשר בנה בשמרון׃
(BHSCO) 1 Kings 16 : 33 ויעש אחאב את־האשרה ויוסף אחאב לעשות להכעיס את־יהוה אלהי ישראל מכל מלכי ישראל אשר היו לפניו׃
(BHSCO) 1 Kings 16 : 34 בימיו בנה חיאל בית האלי את־יריחה באבירם בכרו יסדה [כ ובשגיב] [ק ובשגוב] צעירו הציב דלתיה כדבר יהוה אשר דבר ביד יהושע בן־נון׃ ס