(BHSCO) 1 Kings 8 : 1 אז יקהל שלמה את־זקני ישראל את־כל־ראשי המטות נשיאי האבות לבני ישראל אל־המלך שלמה ירושלם להעלות את־ארון ברית־יהוה מעיר דוד היא ציון׃
(BHSCO) 1 Kings 8 : 2 ויקהלו אל־המלך שלמה כל־איש ישראל בירח האתנים בחג הוא החדש השביעי׃
(BHSCO) 1 Kings 8 : 3 ויבאו כל זקני ישראל וישאו הכהנים את־הארון׃
(BHSCO) 1 Kings 8 : 4 ויעלו את־ארון יהוה ואת־אהל מועד ואת־כל־כלי הקדש אשר באהל ויעלו אתם הכהנים והלוים׃
(BHSCO) 1 Kings 8 : 5 והמלך שלמה וכל־עדת ישראל הנועדים עליו אתו לפני הארון מזבחים צאן ובקר אשר לא־יספרו ולא ימנו מרב׃
(BHSCO) 1 Kings 8 : 6 ויבאו הכהנים את־ארון ברית־יהוה אל־מקומו אל־דביר הבית אל־קדש הקדשים אל־תחת כנפי הכרובים׃
(BHSCO) 1 Kings 8 : 7 כי הכרובים פרשים כנפים אל־מקום הארון ויסכו הכרבים על־הארון ועל־בדיו מלמעלה׃
(BHSCO) 1 Kings 8 : 8 ויארכו הבדים ויראו ראשי הבדים מן־הקדש על־פני הדביר ולא יראו החוצה ויהיו שם עד היום הזה׃
(BHSCO) 1 Kings 8 : 9 אין בארון רק שני לחות האבנים אשר הנח שם משה בחרב אשר כרת יהוה עם־בני ישראל בצאתם מארץ מצרים׃
(BHSCO) 1 Kings 8 : 10 ויהי בצאת הכהנים מן־הקדש והעןן מלא את־בית יהוה׃
(BHSCO) 1 Kings 8 : 11 ולא־יכלו הכהנים לעמד לשרת מפני העןן כי־מלא כבוד־יהוה את־בית יהוה׃ ף
(BHSCO) 1 Kings 8 : 12 אז אמר שלמה יהוה אמר לשכן בערפל׃
(BHSCO) 1 Kings 8 : 13 בנה בניתי בית זבל לך מכון לשבתך עולמים׃
(BHSCO) 1 Kings 8 : 14 ויסב המלך את־פניו ויברך את כל־קהל ישראל וכל־קהל ישראל עמד׃
(BHSCO) 1 Kings 8 : 15 ויאמר ברוך יהוה אלהי ישראל אשר דבר בפיו את דוד אבי ובידו מלא לאמר׃
(BHSCO) 1 Kings 8 : 16 מן־היום אשר הוצאתי את־עמי את־ישראל ממצרים לא־בחרתי בעיר מכל שבטי ישראל לבנות בית להיות שמי שם ואבחר בדוד להיות על־עמי ישראל׃
(BHSCO) 1 Kings 8 : 17 ויהי עם־לבב דוד אבי לבנות בית לשם יהוה אלהי ישראל׃
(BHSCO) 1 Kings 8 : 18 ויאמר יהוה אל־דוד אבי יען אשר היה עם־לבבך לבנות בית לשמי הטיבת כי היה עם־לבבך׃
(BHSCO) 1 Kings 8 : 19 רק אתה לא תבנה הבית כי אם־בנך היצא מחלציך הוא־יבנה הבית לשמי׃
(BHSCO) 1 Kings 8 : 20 ויקם יהוה את־דברו אשר דבר ואקם תחת דוד אבי ואשב על־כסא ישראל כאשר דבר יהוה ואבנה הבית לשם יהוה אלהי ישראל׃
(BHSCO) 1 Kings 8 : 21 ואשם שם מקום לארון אשר־שם ברית יהוה אשר כרת עם־אבתינו בהוציאו אתם מארץ מצרים׃ ס
(BHSCO) 1 Kings 8 : 22 ויעמד שלמה לפני מזבח יהוה נגד כל־קהל ישראל ויפרש כפיו השמים׃
(BHSCO) 1 Kings 8 : 23 ויאמר יהוה אלהי ישראל אין־כמוך אלהים בשמים ממעל ועל־הארץ מתחת שמר הברית והחסד לעבדיך ההלכים לפניך בכל־לבם׃
(BHSCO) 1 Kings 8 : 24 אשר שמרת לעבדך דוד אבי את אשר־דברת לו ותדבר בפיך ובידך מלאת כיום הזה׃
(BHSCO) 1 Kings 8 : 25 ועתה יהוה אלהי ישראל שמר לעבדך דוד אבי את אשר דברת לו לאמר לא־יכרת לך איש מלפני ישב על־כסא ישראל רק אם־ישמרו בניך את־דרכם ללכת לפני כאשר הלכת לפני׃
(BHSCO) 1 Kings 8 : 26 ועתה אלהי ישראל יאמן נא [כ דבריך] [ק דברך] אשר דברת לעבדך דוד אבי׃
(BHSCO) 1 Kings 8 : 27 כי האמנם ישב אלהים על־הארץ הנה השמים ושמי השמים לא יכלכלוך אף כי־הבית הזה אשר בניתי׃
(BHSCO) 1 Kings 8 : 28 ופנית אל־תפלת עבדך ואל־תחנתו יהוה אלהי לשמע אל־הרנה ואל־התפלה אשר עבדך מתפלל לפניך היום׃
(BHSCO) 1 Kings 8 : 29 להיות עינך פתחות אל־הבית הזה לילה ויום אל־המקום אשר אמרת יהיה שמי שם לשמע אל־התפלה אשר יתפלל עבדך אל־המקום הזה׃
(BHSCO) 1 Kings 8 : 30 ושמעת אל־תחנת עבדך ועמך ישראל אשר יתפללו אל־המקום הזה ואתה תשמע אל־מקום שבתך אל־השמים ושמעת וסלחת׃
(BHSCO) 1 Kings 8 : 31 את אשר יחטא איש לרעהו ונשא־בו אלה להאלתו ובא אלה לפני מזבחך בבית הזה׃
(BHSCO) 1 Kings 8 : 32 ואתה תשמע השמים ועשית ושפטת את־עבדיך להרשיע רשע לתת דרכו בראשו ולהצדיק צדיק לתת לו כצדקתו׃ ס
(BHSCO) 1 Kings 8 : 33 בהנגף עמך ישראל לפני אויב אשר יחטאו־לך ושבו אליך והודו את־שמך והתפללו והתחננו אליך בבית הזה׃
(BHSCO) 1 Kings 8 : 34 ואתה תשמע השמים וסלחת לחטאת עמך ישראל והשבתם אל־האדמה אשר נתת לאבותם׃ ס
(BHSCO) 1 Kings 8 : 35 בהעצר שמים ולא־יהיה מטר כי יחטאו־לך והתפללו אל־המקום הזה והודו את־שמך ומחטאתם ישובון כי תענם׃
(BHSCO) 1 Kings 8 : 36 ואתה תשמע השמים וסלחת לחטאת עבדיך ועמך ישראל כי תורם את־הדרך הטובה אשר ילכו־בה ונתתה מטר על־ארצך אשר־נתתה לעמך לנחלה׃ ס
(BHSCO) 1 Kings 8 : 37 רעב כי־יהיה בארץ דבר כי־יהיה שדפון ירקון ארבה חסיל כי יהיה כי יצר־לו איבו בארץ שעריו כל־נגע כל־מחלה׃
(BHSCO) 1 Kings 8 : 38 כל־תפלה כל־תחנה אשר תהיה לכל־האדם לכל עמך ישראל אשר ידעון איש נגע לבבו ופרש כפיו אל־הבית הזה׃
(BHSCO) 1 Kings 8 : 39 ואתה תשמע השמים מכון שבתך וסלחת ועשית ונתת לאיש ככל־דרכיו אשר תדע את־לבבו כי־אתה ידעת לבדך את־לבב כל־בני האדם׃
(BHSCO) 1 Kings 8 : 40 למען יראוך כל־הימים אשר־הם חיים על־פני האדמה אשר נתתה לאבתינו׃
(BHSCO) 1 Kings 8 : 41 וגם אל־הנכרי אשר לא־מעמך ישראל הוא ובא מארץ רחוקה למען שמך׃
(BHSCO) 1 Kings 8 : 42 כי ישמעון את־שמך הגדול ואת־ידך החזקה וזרעך הנטויה ובא והתפלל אל־הבית הזה׃
(BHSCO) 1 Kings 8 : 43 אתה תשמע השמים מכון שבתך ועשית ככל אשר־יקרא אליך הנכרי למען ידעון כל־עמי הארץ את־שמך ליראה אתך כעמך ישראל ולדעת כי־שמך נקרא על־הבית הזה אשר בניתי׃
(BHSCO) 1 Kings 8 : 44 כי־יצא עמך למלחמה על־איבו בדרך אשר תשלחם והתפללו אל־יהוה דרך העיר אשר בחרת בה והבית אשר־בנתי לשמך׃
(BHSCO) 1 Kings 8 : 45 ושמעת השמים את־תפלתם ואת־תחנתם ועשית משפטם׃
(BHSCO) 1 Kings 8 : 46 כי יחטאו־לך כי אין אדם אשר לא־יחטא ואנפת בם ונתתם לפני אויב ושבום שביהם אל־ארץ האויב רחוקה או קרובה׃
(BHSCO) 1 Kings 8 : 47 והשיבו אל־לבם בארץ אשר נשבו־שם ושבו והתחננו אליך בארץ שביהם לאמר חטאנו והעוינו רשענו׃
(BHSCO) 1 Kings 8 : 48 ושבו אליך בכל־לבבם ובכל־נפשם בארץ איביהם אשר־שבו אתם והתפללו אליך דרך ארצם אשר נתתה לאבותם העיר אשר בחרת והבית אשר־[כ בנית] [ק בניתי] לשמך׃
(BHSCO) 1 Kings 8 : 49 ושמעת השמים מכון שבתך את־תפלתם ואת־תחנתם ועשית משפטם׃
(BHSCO) 1 Kings 8 : 50 וסלחת לעמך אשר חטאו־לך ולכל־פשעיהם אשר פשעו־בך ונתתם לרחמים לפני שביהם ורחמום׃
(BHSCO) 1 Kings 8 : 51 כי־עמך ונחלתך הם אשר הוצאת ממצרים מתוך כור הברזל׃
(BHSCO) 1 Kings 8 : 52 להיות עיניך פתחות אל־תחנת עבדך ואל־תחנת עמך ישראל לשמע אליהם בכל קראם אליך׃
(BHSCO) 1 Kings 8 : 53 כי־אתה הבדלתם לך לנחלה מכל עמי הארץ כאשר דברת ביד משה עבדך בהוציאך את־אבתינו ממצרים אדני יהוה׃ ף
(BHSCO) 1 Kings 8 : 54 ויהי ככלות שלמה להתפלל אל־יהוה את כל־התפלה והתחנה הזאת קם מלפני מזבח יהוה מכרע על־ברכיו וכפיו פרשות השמים׃
(BHSCO) 1 Kings 8 : 55 ויעמד ויברך את כל־קהל ישראל קול גדול לאמר׃
(BHSCO) 1 Kings 8 : 56 ברוך יהוה אשר נתן מנוחה לעמו ישראל ככל אשר דבר לא־נפל דבר אחד מכל דברו הטוב אשר דבר ביד משה עבדו׃
(BHSCO) 1 Kings 8 : 57 יהי יהוה אלהינו עמנו כאשר היה עם־אבתינו אל־יעזבנו ואל־יטשנו׃
(BHSCO) 1 Kings 8 : 58 להטות לבבנו אליו ללכת בכל־דרכיו ולשמר מצותיו וחקיו ומשפטיו אשר צוה את־אבתינו׃
(BHSCO) 1 Kings 8 : 59 ויהיו דברי אלה אשר התחננתי לפני יהוה קרבים אל־יהוה אלהינו יוםם ולילה לעשות משפט עבדו ומשפט עמו ישראל דבר־יום ביומו׃
(BHSCO) 1 Kings 8 : 60 למען דעת כל־עמי הארץ כי יהוה הוא האלהים אין עוד׃
(BHSCO) 1 Kings 8 : 61 והיה לבבכם שלם עם יהוה אלהינו ללכת בחקיו ולשמר מצותיו כיום הזה׃
(BHSCO) 1 Kings 8 : 62 והמלך וכל־ישראל עמו זבחים זבח לפני יהוה׃
(BHSCO) 1 Kings 8 : 63 ויזבח שלמה את זבח השלמים אשר זבח ליהוה בקר עשרים ושנים אלף וצאן מאה ועשרים אלף ויחנכו את־בית יהוה המלך וכל־בני ישראל׃
(BHSCO) 1 Kings 8 : 64 ביום ההוא קדש המלך את־תוך החצר אשר לפני בית־יהוה כי־עשה שם את־העלה ואת־המנחה ואת חלבי השלמים כי־מזבח הנחשת אשר לפני יהוה קטן מהכיל את־העלה ואת־המנחה ואת חלבי השלמים׃
(BHSCO) 1 Kings 8 : 65 ויעש שלמה בעת־ההיא את־החג וכל־ישראל עמו קהל גדול מלבוא חמת עד־נחל מצרים לפני יהוה אלהינו שבעת ימים ושבעת ימים ארבעה עשר יום׃
(BHSCO) 1 Kings 8 : 66 ביום השמיני שלח את־העם ויברכו את־המלך וילכו לאהליהם שמחים וטובי לב על כל־הטובה אשר עשה יהוה לדוד עבדו ולישראל עמו׃