(BHSCO) 1 Kings 5 : 1 וישלח חירם מלך־צור את־עבדיו אל־שלמה כי שמע כי אתו משחו למלך תחת אביהו כי אהב היה חירם לדוד כל־הימים׃ ס
(BHSCO) 1 Kings 5 : 2 וישלח שלמה אל־חירם לאמר׃
(BHSCO) 1 Kings 5 : 3 אתה ידעת את־דוד אבי כי לא יכל לבנות בית לשם יהוה אלהיו מפני המלחמה אשר סבבהו עד תת־יהוה אתם תחת כפות [כ רגלו] [ק רגלי]׃
(BHSCO) 1 Kings 5 : 4 ועתה הניח יהוה אלהי לי מסביב אין שטן ואין פגע רע׃
(BHSCO) 1 Kings 5 : 5 והנני אמר לבנות בית לשם יהוה אלהי כאשר דבר יהוה אל־דוד אבי לאמר בנך אשר אתן תחתיך על־כסאך הוא־יבנה הבית לשמי׃
(BHSCO) 1 Kings 5 : 6 ועתה צוה ויכרתו־לי ארזים מן־הלבנון ועבדי יהיו עם־עבדיך ושכר עבדיך אתן לך ככל אשר תאמר כי אתה ידעת כי אין בנו איש ידע לכרת־עצים כצדנים׃
(BHSCO) 1 Kings 5 : 7 ויהי כשמע חירם את־דברי שלמה וישמח מאד ויאמר ברוך יהוה היום אשר נתן לדוד בן חכם על־העם הרב הזה׃
(BHSCO) 1 Kings 5 : 8 וישלח חירם אל־שלמה לאמר שמעתי את אשר־שלחת אלי אני אעשה את־כל־חפצך בעצי ארזים ובעצי ברושים׃
(BHSCO) 1 Kings 5 : 9 עבדי ירדו מן־הלבנון ימה ואני אשיםם דברות בים עד־המקום אשר־תשלח אלי ונפצתים שם ואתה תשא ואתה תעשה את־חפצי לתת לחם ביתי׃
(BHSCO) 1 Kings 5 : 10 ויהי חירום נתן לשלמה עצי ארזים ועצי ברושים כל־חפצו׃
(BHSCO) 1 Kings 5 : 11 ושלמה נתן לחירם עשרים אלף כר חטים מכלת לביתו ועשרים כר שמן כתית כה־יתן שלמה לחירם שנה בשנה׃ ף
(BHSCO) 1 Kings 5 : 12 ויהוה נתן חכמה לשלמה כאשר דבר־לו ויהי שלם בין חירם ובין שלמה ויכרתו ברית שניהם׃
(BHSCO) 1 Kings 5 : 13 ויעל המלך שלמה מס מכל־ישראל ויהי המס שלשים אלף איש׃
(BHSCO) 1 Kings 5 : 14 וישלחם לבנונה עשרת אלפים בחדש חליפות חדש יהיו בלבנון שנים חדשים בביתו ואדנירם על־המס׃ ס
(BHSCO) 1 Kings 5 : 15 ויהי לשלמה שבעים אלף נשא סבל ושמנים אלף חצב בהר׃
(BHSCO) 1 Kings 5 : 16 לבד משרי הנצבים לשלמה אשר על־המלאכה שלשת אלפים ושלש מאות הרדים בעם העשים במלאכה׃
(BHSCO) 1 Kings 5 : 17 ויצו המלך ויסעו אבנים גדלות אבנים יקרות ליסד הבית אבני גזית׃
(BHSCO) 1 Kings 5 : 18 ויפסלו בני שלמה ובני חירום והגבלים ויכינו העצים והאבנים לבנות הבית׃ ף