BHSCO - 1 Chr 23

(BHSCO) 1 Chronicles 23 : 1 ודויד זקן ושבע ימים וימלך את־שלמה בנו על־ישראל׃

(BHSCO) 1 Chronicles 23 : 2 ויאסף את־כל־שרי ישראל והכהנים והלוים׃

(BHSCO) 1 Chronicles 23 : 3 ויספרו הלוים מבן שלשים שנה ומעלה ויהי מספרם לגלגלתם לגברים שלשים ושמונה אלף׃

(BHSCO) 1 Chronicles 23 : 4 מאלה לנצח על־מלאכת בית־יהוה עשרים וארבעה אלף ושטרים ושפטים ששת אלפים׃

(BHSCO) 1 Chronicles 23 : 5 וארבעת אלפים שערים וארבעת אלפים מהללים ליהוה בכלים אשר עשיתי להלל׃

(BHSCO) 1 Chronicles 23 : 6 ויחלקם דויד מחלקות ס לבני לוי לגרשון קהת ומררי׃ ס

(BHSCO) 1 Chronicles 23 : 7 לגרשני לעדן ושמעי׃ ס

(BHSCO) 1 Chronicles 23 : 8 בני לעדן הראש יחיאל וזתם ויואל שלשה׃ ס

(BHSCO) 1 Chronicles 23 : 9 בני שמעי [כ שלמות] [ק שלומית] וחזיאל והרן שלשה אלה ראשי האבות ללעדן׃ ס

(BHSCO) 1 Chronicles 23 : 10 ובני שמעי יחת זינא ויעוש ובריעה אלה בני־שמעי ארבעה׃

(BHSCO) 1 Chronicles 23 : 11 ויהי־יחת הראש וזיזה השני ויעוש ובריעה לא־הרבו בנים ויהיו לבית אב לפקדה אחת׃ ס

(BHSCO) 1 Chronicles 23 : 12 בני קהת עמרם יצהר חברון ועזיאל ארבעה׃ ס

(BHSCO) 1 Chronicles 23 : 13 בני עמרם אהרן ומשה ויבדל אהרן להקדישו קדש קדשים הוא־ובניו עד־עולם להקטיר לפני יהוה לשרתו ולברך בשמו עד־עולם׃

(BHSCO) 1 Chronicles 23 : 14 ומשה איש האלהים בניו יקראו על־שבט הלוי׃

(BHSCO) 1 Chronicles 23 : 15 בני משה גרשם ואליעזר׃

(BHSCO) 1 Chronicles 23 : 16 בני גרשום שבואל הראש׃

(BHSCO) 1 Chronicles 23 : 17 ויהיו בני־אליעזר רחביה הראש ולא־היה לאליעזר בנים אחרים ובני רחביה רבו למעלה׃

(BHSCO) 1 Chronicles 23 : 18 בני יצהר שלמית הראש׃ ס

(BHSCO) 1 Chronicles 23 : 19 בני חברון יריהו הראש אמריה השני יחזיאל השלישי ויקמעם הרביעי׃

(BHSCO) 1 Chronicles 23 : 20 בני עזיאל מיכה הראש וישיה השני׃ ס

(BHSCO) 1 Chronicles 23 : 21 בני מררי מחלי ומושי בני מחלי אלעזר וקיש׃

(BHSCO) 1 Chronicles 23 : 22 וימת אלעזר ולא־היו לו בנים כי אם־בנות וישאום בני־קיש אחיהם׃

(BHSCO) 1 Chronicles 23 : 23 בני מושי מחלי ועדר וירמות שלשה׃

(BHSCO) 1 Chronicles 23 : 24 אלה בני־לוי לבית אבתיהם ראשי האבות לפקודיהם במספר שמות לגלגלתם עשה המלאכה לעבדת בית יהוה מבן עשרים שנה ומעלה׃

(BHSCO) 1 Chronicles 23 : 25 כי אמר דויד הניח יהוה אלהי־ישראל לעמו וישכן בירושלם עד־לעולם׃

(BHSCO) 1 Chronicles 23 : 26 וגם ללוים אין־לשאת את־המשכן ואת־כל־כליו לעבדתו׃

(BHSCO) 1 Chronicles 23 : 27 כי בדברי דויד האחרנים המה מספר בני־לוי מבן עשרים שנה ולמעלה׃

(BHSCO) 1 Chronicles 23 : 28 כי מעמדם ליד־בני אהרן לעבדת בית יהוה על־החצרות ועל־הלשכות ועל־טהרת לכל־קדש ומעשה עבדת בית האלהים׃

(BHSCO) 1 Chronicles 23 : 29 וללחם המערכת ולסלת למנחה ולרקיקי המצות ולמחבת ולמרבכת ולכל־משורה ומדה׃

(BHSCO) 1 Chronicles 23 : 30 ולעמד בבקר בבקר להדות ולהלל ליהוה וכן לערב׃

(BHSCO) 1 Chronicles 23 : 31 ולכל העלות עלות ליהוה לשבתות לחדשים ולמעדים במספר כמשפט עליהם תמיד לפני יהוה׃

(BHSCO) 1 Chronicles 23 : 32 ושמרו את־משמרת אהל־מועד ואת משמרת הקדש ומשמרת בני אהרן אחיהם לעבדת בית יהוה׃ ף