BHSCO - Ecc 4

(BHSCO) Ecclesiastes 4 : 1 ושבתי אני ואראה את־כל־העשקים אשר נעשים תחת השמש והנה דמעת העשקים ואין להם מנחם ומיד עשקיהם כח ואין להם מנחם׃

(BHSCO) Ecclesiastes 4 : 2 ושבח אני את־המתים שכבר מתו מן־החיים אשר המה חיים עדנה׃

(BHSCO) Ecclesiastes 4 : 3 וטוב משניהם את אשר־עדן לא היה אשר לא־ראה את־המעשה הרע אשר נעשה תחת השמש׃

(BHSCO) Ecclesiastes 4 : 4 וראיתי אני את־כל־עמל ואת כל־כשרון המעשה כי היא קנאת־איש מרעהו גם־זה הבל ורעות רוח׃

(BHSCO) Ecclesiastes 4 : 5 הכסיל חבק את־ידיו ואכל את־בשרו׃

(BHSCO) Ecclesiastes 4 : 6 טוב מלא כף נחת ממלא חפנים עמל ורעות רוח׃

(BHSCO) Ecclesiastes 4 : 7 ושבתי אני ואראה הבל תחת השמש׃

(BHSCO) Ecclesiastes 4 : 8 יש אחד ואין שני גם בן ואח אין־לו ואין קץ לכל־עמלו גם־[כ עיניו] [ק עינו] לא־תשבע עשר ולמי אני עמל ומחסר את־נפשי מטובה גם־זה הבל וענין רע הוא׃

(BHSCO) Ecclesiastes 4 : 9 טובים השנים מן־האחד אשר יש־להם שכר טוב בעמלם׃

(BHSCO) Ecclesiastes 4 : 10 כי אם־יפלו האחד יקים את־חברו ואילו האחד שיפול ואין שני להקימו׃

(BHSCO) Ecclesiastes 4 : 11 גם אם־ישכבו שנים וחם להם ולאחד איך יחם׃

(BHSCO) Ecclesiastes 4 : 12 ואם־יתקפו האחד השנים יעמדו נגדו והחוט המשלש לא במהרה ינתק׃

(BHSCO) Ecclesiastes 4 : 13 טוב ילד מסכן וחכם ממלך זקן וכסיל אשר לא־ידע להזהר עוד׃

(BHSCO) Ecclesiastes 4 : 14 כי־מבית הסורים יצא למלך כי גם במלכותו נולד רש׃

(BHSCO) Ecclesiastes 4 : 15 ראיתי את־כל־החיים המהלכים תחת השמש עם הילד השני אשר יעמד תחתיו׃

(BHSCO) Ecclesiastes 4 : 16 אין־קץ לכל־העם לכל אשר־היה לפניהם גם האחרונים לא ישמחו־בו כי־גם־זה הבל ורעיון רוח׃