(BHSCO) Jeremiah 33 : 1 ויהי דבר־יהוה אל־ירמיהו שנית והוא עודנו עצור בחצר המטרה לאמר׃
(BHSCO) Jeremiah 33 : 2 כה־אמר יהוה עשה יהוה יוצר אותה להכינה יהוה שמו׃
(BHSCO) Jeremiah 33 : 3 קרא אלי ואענך ואגידה לך גדלות ובצרות לא ידעתם׃ ס
(BHSCO) Jeremiah 33 : 4 כי כה אמר יהוה אלהי ישראל על־בתי העיר הזאת ועל־בתי מלכי יהודה הנתצים אל־הסללות ואל־החרב׃
(BHSCO) Jeremiah 33 : 5 באים להלחם את־הכשדים ולמלאם את־פגרי האדם אשר־הכיתי באפי ובחמתי ואשר הסתרתי פני מהעיר הזאת על כל־רעתם׃
(BHSCO) Jeremiah 33 : 6 הנני מעלה־לה ארכה ומרפא ורפאתים וגליתי להם עתרת שלום ואמת׃
(BHSCO) Jeremiah 33 : 7 והשבתי את־שבות יהודה ואת שבות ישראל ובנתים כבראשנה׃
(BHSCO) Jeremiah 33 : 8 וטהרתים מכל־עונם אשר חטאו־לי וסלחתי [כ לכול] [ק לכל]־עונותיהם אשר חטאו־לי ואשר פשעו בי׃
(BHSCO) Jeremiah 33 : 9 והיתה לי לשם ששון לתהלה ולתפארת לכל גויי הארץ אשר ישמעו את־כל־הטובה אשר אנכי עשה אתם ופחדו ורגזו על כל־הטובה ועל כל־השלום אשר אנכי עשה לה׃ ס
(BHSCO) Jeremiah 33 : 10 כה אמר יהוה עוד ישמע במקום־הזה אשר אתם אמרים חרב הוא מאין אדם ומאין בהמה בערי יהודה ובחצות ירושלם הנשמות מאין אדם ומאין יושב ומאין בהמה׃
(BHSCO) Jeremiah 33 : 11 קול ששון וקול שמחה קול חתן וקול כלה קול אמרים הודו את־יהוה צבאות כי־טוב יהוה כי־לעולם חסדו מבאים תודה בית יהוה כי־אשיב את־שבות־הארץ כבראשנה אמר יהוה׃ ס
(BHSCO) Jeremiah 33 : 12 כה־אמר יהוה צבאות עוד יהיה במקום הזה החרב מאין־אדם ועד־בהמה ובכל־עריו נוה רעים מרבצים צאן׃
(BHSCO) Jeremiah 33 : 13 בערי ההר בערי השפלה ובערי הנגב ובארץ בנימן ובסביבי ירושלם ובערי יהודה עד תעברנה הצאן על־ידי מונה אמר יהוה׃ ס
(BHSCO) Jeremiah 33 : 14 הנה ימים באים נאם־יהוה והקמתי את־הדבר הטוב אשר דברתי אל־בית ישראל ועל־בית יהודה׃
(BHSCO) Jeremiah 33 : 15 בימים ההם ובעת ההיא אצמיח לדוד צמח צדקה ועשה משפט וצדקה בארץ׃
(BHSCO) Jeremiah 33 : 16 בימים ההם תושע יהודה וירושלם תשכון לבטח וזה אשר־יקרא־לה יהוה צדקנו׃ ס
(BHSCO) Jeremiah 33 : 17 כי־כה אמר יהוה לא־יכרת לדוד איש ישב על־כסא בית־ישראל׃
(BHSCO) Jeremiah 33 : 18 ולכהנים הלוים לא־יכרת איש מלפני מעלה עולה ומקטיר מנחה ועשה־זבח* כל־הימים׃ ס
(BHSCO) Jeremiah 33 : 19 ויהי דבר־יהוה אל־ירמיהו לאמור׃
(BHSCO) Jeremiah 33 : 20 כה אמר יהוה אם־תפרו את־בריתי היום ואת־בריתי הלילה ולבלתי היות יוםם־ולילה בעתם׃
(BHSCO) Jeremiah 33 : 21 גם־בריתי תפר את־דוד עבדי מהיות־לו בן מלך על־כסאו ואת־הלוים הכהנים משרתי׃
(BHSCO) Jeremiah 33 : 22 אשר לא־יספר צבא השמים ולא ימד חול הים כן ארבה את־זרע דוד עבדי ואת־הלוים משרתי אתי׃ ס
(BHSCO) Jeremiah 33 : 23 ויהי דבר־יהוה אל־ירמיהו לאמר׃
(BHSCO) Jeremiah 33 : 24 הלוא ראית מה־העם הזה דברו לאמר שתי המשפחות אשר בחר יהוה בהם וימאסם ואת־עמי ינאצון מהיות עוד גוי לפניהם׃ ס
(BHSCO) Jeremiah 33 : 25 כה אמר יהוה אם־לא בריתי יוםם ולילה חקות שמים וארץ לא־שמתי׃
(BHSCO) Jeremiah 33 : 26 גם־זרע יעקוב ודוד עבדי אמאס מקחת מזרעו משלים אל־זרע אברהם ישחק ויעקב כי־[כ אשוב] [ק אשיב] את־שבותם ורחמתים׃ ס