(BHSCO) Numbers 17 : 1 וידבר יהוה אל־משה לאמר׃
(BHSCO) Numbers 17 : 2 דבר אל־בני ישראל וקח מאתם מטה מטה לבית אב מאת כל־נשיאהם לבית אבתם שנים עשר מטות איש את־שמו תכתב על־מטהו׃
(BHSCO) Numbers 17 : 3 ואת שם אהרן תכתב על־מטה לוי כי מטה אחד לראש בית אבותם׃
(BHSCO) Numbers 17 : 4 והנחתם באהל מועד לפני העדות אשר אועד לכם שמה׃
(BHSCO) Numbers 17 : 5 והיה האיש אשר אבחר־בו מטהו יפרח והשכתי מעלי את־תלנות בני ישראל אשר הם מלינם עליכם׃
(BHSCO) Numbers 17 : 6 וידבר משה אל־בני ישראל ויתנו אליו כל־נשיאיהם מטה לנשיא אחד מטה לנשיא אחד לבית אבתם שנים עשר מטות ומטה אהרן בתוך מטותם׃
(BHSCO) Numbers 17 : 7 וינח משה את־המטת לפני יהוה באהל העדת׃
(BHSCO) Numbers 17 : 8 ויהי ממחרת ויבא משה אל־אהל העדות והנה פרח מטה־אהרן לבית לוי ויצא פרח ויץץ ציץ ויגמל שקדים׃
(BHSCO) Numbers 17 : 9 ויצא משה את־כל־המטת מלפני יהוה אל־כל־בני ישראל ויראו ויקחו איש מטהו׃ ס
(BHSCO) Numbers 17 : 10 ויאמר יהוה אל־משה השב את־מטה אהרן לפני העדות למשמרת לאות לבני־מרי ותכל תלונתם מעלי ולא ימתו׃
(BHSCO) Numbers 17 : 11 ויעש משה כאשר צוה יהוה אתו כן עשה׃ ס
(BHSCO) Numbers 17 : 12 ויאמרו בני ישראל אל־משה לאמר הן גוענו אבדנו כלנו אבדנו׃
(BHSCO) Numbers 17 : 13 כל הקרב הקרב אל־משכן יהוה ימות האם תמנו לגוע׃ ס