(BHSCO) Numbers 35 : 1 וידבר יהוה אל־משה בערבת מואב על־ירדן ירחו לאמר׃
(BHSCO) Numbers 35 : 2 צו את־בני ישראל ונתנו ללוים מנחלת אחזתם ערים לשבת ומגרש לערים סביבתיהם תתנו ללוים׃
(BHSCO) Numbers 35 : 3 והיו הערים להם לשבת ומגרשיהם יהיו לבהמתם ולרכשם ולכל חיתם׃
(BHSCO) Numbers 35 : 4 ומגרשי הערים אשר תתנו ללוים מקיר העיר וחוצה אלף אמה סביב׃
(BHSCO) Numbers 35 : 5 ומדתם מחוץ לעיר את־פאת־קדמה אלפים באמה ואת־פאת־נגב אלפים באמה ואת־פאת־ים אלפים באמה ואת פאת צפון אלפים באמה והעיר בתוך זה יהיה להם מגרשי הערים׃
(BHSCO) Numbers 35 : 6 ואת הערים אשר תתנו ללוים את שש־ערי המקלט אשר תתנו לנס שמה הרצח ועליהם תתנו ארבעים ושתים עיר׃
(BHSCO) Numbers 35 : 7 כל־הערים אשר תתנו ללוים ארבעים ושמנה עיר אתהן ואת־מגרשיהן׃
(BHSCO) Numbers 35 : 8 והערים אשר תתנו מאחזת בני־ישראל מאת הרב תרבו ומאת המעט תמעיטו איש כפי נחלתו אשר ינחלו יתן מעריו ללוים׃ ף
(BHSCO) Numbers 35 : 9 וידבר יהוה אל־משה לאמר׃
(BHSCO) Numbers 35 : 10 דבר אל־בני ישראל ואמרת אלהם כי אתם עברים את־הירדן ארצה כנען׃
(BHSCO) Numbers 35 : 11 והקריתם לכם ערים ערי מקלט תהיינה לכם ונס שמה רצח מכה־נפש בשגגה׃
(BHSCO) Numbers 35 : 12 והיו לכם הערים למקלט מגאל ולא ימות הרצח עד־עמדו לפני העדה למשפט׃
(BHSCO) Numbers 35 : 13 והערים אשר תתנו שש־ערי מקלט תהיינה לכם׃
(BHSCO) Numbers 35 : 14 את שלש הערים תתנו מעבר לירדן ואת שלש הערים תתנו בארץ כנען ערי מקלט תהיינה׃
(BHSCO) Numbers 35 : 15 לבני ישראל ולגר ולתושב בתוכם תהיינה שש־הערים האלה למקלט לנוס שמה כל־מכה־נפש בשגגה׃
(BHSCO) Numbers 35 : 16 ואם־בכלי ברזל הכהו וימת רצח הוא מות יומת הרצח׃
(BHSCO) Numbers 35 : 17 ואם באבן יד אשר־ימות בה הכהו וימת רצח הוא מות יומת הרצח׃
(BHSCO) Numbers 35 : 18 או בכלי עץ־יד אשר־ימות בו הכהו וימת רצח הוא מות יומת הרצח׃
(BHSCO) Numbers 35 : 19 גאל הדם הוא ימית את־הרצח בפגעו־בו הוא ימיתנו׃
(BHSCO) Numbers 35 : 20 ואם־בשנאה יהדפנו או־השליך עליו בצדיה וימת׃
(BHSCO) Numbers 35 : 21 או באיבה הכהו בידו וימת מות־יומת המכה רצח הוא גאל הדם ימית את־הרצח בפגעו־בו׃
(BHSCO) Numbers 35 : 22 ואם־בפתע בלא־איבה הדפו או־השליך עליו כל־כלי בלא צדיה׃
(BHSCO) Numbers 35 : 23 או בכל־אבן אשר־ימות בה בלא ראות ויפל עליו וימת והוא לא־אויב לו ולא מבקש רעתו׃
(BHSCO) Numbers 35 : 24 ושפטו העדה בין המכה ובין גאל הדם על המשפטים האלה׃
(BHSCO) Numbers 35 : 25 והצילו העדה את־הרצח מיד גאל הדם והשיבו אתו העדה אל־עיר מקלטו אשר־נס שמה וישב בה עד־מות הכהן הגדל אשר־משח אתו בשמן הקדש׃
(BHSCO) Numbers 35 : 26 ואם־יצא יצא הרצח את־גבול עיר מקלטו אשר ינוס שמה׃
(BHSCO) Numbers 35 : 27 ומצא אתו גאל הדם מחוץ לגבול עיר מקלטו ורצח גאל הדם את־הרצח אין לו דם׃
(BHSCO) Numbers 35 : 28 כי בעיר מקלטו ישב עד־מות הכהן הגדל ואחרי מות הכהן הגדל ישוב הרצח אל־ארץ אחזתו׃
(BHSCO) Numbers 35 : 29 והיו אלה לכם לחקת משפט לדרתיכם בכל מושבתיכם׃
(BHSCO) Numbers 35 : 30 כל־מכה־נפש לפי עדים ירצח את־הרצח ועד אחד לא־יענה בנפש למות׃
(BHSCO) Numbers 35 : 31 ולא־תקחו כפר לנפש רצח אשר־הוא רשע למות כי־מות יומת׃
(BHSCO) Numbers 35 : 32 ולא־תקחו כפר לנוס אל־עיר מקלטו לשוב לשבת בארץ עד־מות הכהן׃
(BHSCO) Numbers 35 : 33 ולא־תחניפו את־הארץ אשר אתם בה כי הדם הוא יחניף את־הארץ ולארץ לא־יכפר לדם אשר שפך־בה כי־אם בדם שפכו׃
(BHSCO) Numbers 35 : 34 ולא תטמא את־הארץ אשר אתם ישבים בה אשר אני שכן בתוכה כי אני יהוה שכן בתוך בני ישראל׃ ף