(BHSCO) Ezekiel 47 : 1 וישבני אל־פתח הבית והנה־מים יצאים מתחת מפתן הבית קדימה כי־פני הבית קדים והמים ירדים מתחת מכתף הבית הימנית מנגב למזבח׃
(BHSCO) Ezekiel 47 : 2 ויוצאני דרך־שער צפונה ויסבני דרך חוץ אל־שער החוץ דרך הפונה קדים והנה־מים מפכים מן־הכתף הימנית׃
(BHSCO) Ezekiel 47 : 3 בצאת־האיש קדים וקו בידו וימד אלף באמה ויעברני במים מי אפסים׃
(BHSCO) Ezekiel 47 : 4 וימד אלף ויעברני במים מים ברכים וימד אלף ויעברני מי מתנים׃
(BHSCO) Ezekiel 47 : 5 וימד אלף נחל אשר לא־אוכל לעבר כי־גאו המים מי שחו נחל אשר לא־יעבר׃
(BHSCO) Ezekiel 47 : 6 ויאמר אלי הראית בן־אדם ויולכני וישבני שפת הנחל׃
(BHSCO) Ezekiel 47 : 7 בשובני והנה אל־שפת הנחל עץ רב מאד מזה ומזה׃
(BHSCO) Ezekiel 47 : 8 ויאמר אלי המים האלה יוצאים אל־הגלילה הקדמונה וירדו על־הערבה ובאו הימה אל־הימה המוצאים [כ ונרפאו] [ק ונרפו] המים׃
(BHSCO) Ezekiel 47 : 9 והיה כל־נפש חיה אשר־ישרץ אל כל־אשר יבוא שם נחלים יחיה והיה הדגה רבה מאד כי באו שמה המים האלה וירפאו וחי כל אשר־יבוא שמה הנחל׃
(BHSCO) Ezekiel 47 : 10 והיה [כ יעמדו] [ק עמדו] עליו דוגים מעין גדי ועד־עין עגלים משטוח לחרמים יהיו למינה תהיה דגתם כדגת הים הגדול רבה מאד׃
(BHSCO) Ezekiel 47 : 11 [כ בצאתו] [ק בצאתיו] וגבאיו ולא ירפאו למלח נתנו׃
(BHSCO) Ezekiel 47 : 12 ועל־הנחל יעלה על־שפתו מזה ומזה כל־עץ־מאכל לא־יבול עלהו ולא־יתם פריו לחדשיו יבכר כי מימיו מן־המקדש המה יוצאים [כ והיו] [ק והיה] פריו למאכל ועלהו לתרופה׃ ס
(BHSCO) Ezekiel 47 : 13 כה אמר אדני יהוה גה גבול אשר תתנחלו את־הארץ לשני עשר שבטי ישראל יוסף חבלים׃
(BHSCO) Ezekiel 47 : 14 ונחלתם אותה איש כאחיו אשר נשאתי את־ידי לתתה לאבתיכם ונפלה הארץ הזאת לכם בנחלה׃
(BHSCO) Ezekiel 47 : 15 וזה גבול הארץ לפאת צפונה מן־הים הגדול הדרך חתלן לבוא צדדה׃
(BHSCO) Ezekiel 47 : 16 חמת ברותה סברים אשר בין־גבול דמשק ובין גבול חמת חצר התיכון אשר אל־גבול חורן׃
(BHSCO) Ezekiel 47 : 17 והיה גבול מן־הים חצר עינון גבול דמשק וצפון צפונה וגבול חמת ואת פאת צפון׃
(BHSCO) Ezekiel 47 : 18 ופאת קדים מבין חורן ומבין־דמשק ומבין הגלעד ומבין ארץ ישראל הירדן מגבול על־הים הקדמוני תמדו ואת פאת קדימה׃
(BHSCO) Ezekiel 47 : 19 ופאת נגב תימנה מתמר עד־מי מריבות קדש נחלה אל־הים הגדול ואת פאת־תימנה נגבה׃
(BHSCO) Ezekiel 47 : 20 ופאת־ים הים הגדול מגבול עד־נכח לבוא חמת זאת פאת־ים׃
(BHSCO) Ezekiel 47 : 21 וחלקתם את־הארץ הזאת לכם לשבטי ישראל׃
(BHSCO) Ezekiel 47 : 22 והיה תפלו אותה בנחלה לכם ולהגרים הגרים בתוככם אשר־הולדו בנים בתוככם והיו לכם כאזרח בבני ישראל אתכם יפלו בנחלה בתוך שבטי ישראל׃
(BHSCO) Ezekiel 47 : 23 והיה בשבט אשר־גר הגר אתו שם תתנו נחלתו נאם אדני יהוה׃ ס