BHSCO - 2 Sam 24

(BHSCO) 2 Samuel 24 : 1 ויסף אף־יהוה לחרות בישראל ויסת את־דוד בהם לאמר לך מנה את־ישראל ואת־יהודה׃

(BHSCO) 2 Samuel 24 : 2 ויאמר המלך אל־יואב שר־החיל אשר־אתו שוט־נא בכל־שבטי ישראל מדן ועד־באר שבע ופקדו את־העם וידעתי את מספר העם׃ ס

(BHSCO) 2 Samuel 24 : 3 ויאמר יואב אל־המלך ויוסף יהוה אלהיך אל־העם כהם וכהם מאה פעמים ועיני אדני־המלך ראות ואדני המלך למה חפץ בדבר הזה׃

(BHSCO) 2 Samuel 24 : 4 ויחזק דבר־המלך אל־יואב ועל שרי החיל ויצא יואב ושרי החיל לפני המלך לפקד את־העם את־ישראל׃

(BHSCO) 2 Samuel 24 : 5 ויעברו את־הירדן ויחנו בערוער ימין העיר אשר בתוך־הנחל הגד ואל־יעזר׃

(BHSCO) 2 Samuel 24 : 6 ויבאו הגלעדה ואל־ארץ תחתים חדשי ויבאו דנה יען וסביב אל־צידון׃

(BHSCO) 2 Samuel 24 : 7 ויבאו מבצר־צר וכל־ערי החוי והכנעני ויצאו אל־נגב יהודה באר שבע׃

(BHSCO) 2 Samuel 24 : 8 וישטו בכל־הארץ ויבאו מקצה תשעה חדשים ועשרים יום ירושלם׃

(BHSCO) 2 Samuel 24 : 9 ויתן יואב את־מספר מפקד־העם אל־המלך ותהי ישראל שמנה מאות אלף איש־חיל שלף חרב ואיש יהודה חמש־מאות אלף איש׃

(BHSCO) 2 Samuel 24 : 10 ויך לב־דוד אתו אחרי־כן ספר את־העם ס ויאמר דוד אל־יהוה חטאתי מאד אשר עשיתי ועתה יהוה העבר־נא את־עון עבדך כי נסכלתי מאד׃

(BHSCO) 2 Samuel 24 : 11 ויקם דוד בבקר ף ודבר־יהוה היה אל־גד הנביא חזה דוד לאמר׃

(BHSCO) 2 Samuel 24 : 12 הלוך ודברת אל־דוד כה אמר יהוה שלש אנכי נוטל עליך בחר־לך אחת־מהם ואעשה־לך׃

(BHSCO) 2 Samuel 24 : 13 ויבא־גד אל־דוד ויגד־לו ויאמר לו התבוא לך שבע שנים רעב בארצך אם־שלשה חדשים נסך לפני־צריך והוא רדפך ואם־היות שלשת ימים דבר בארצך עתה דע וראה מה־אשיב שלחי דבר׃ ס

(BHSCO) 2 Samuel 24 : 14 ויאמר דוד אל־גד צר־לי מאד נפלה־נא ביד־יהוה כי־רבים [כ רחמו] [ק רחמיו] וביד־אדם אל־אפלה׃

(BHSCO) 2 Samuel 24 : 15 ויתן יהוה דבר בישראל מהבקר ועד־עת מועד וימת מן־העם מדן ועד־באר שבע שבעים אלף איש׃

(BHSCO) 2 Samuel 24 : 16 וישלח ידו המלאך ירושלם לשחתה וינחם יהוה אל־הרעה ויאמר למלאך המשחית בעם רב עתה הרף ידך ומלאך יהוה היה עם־גרן [כ האורנה] [ק הארונה] היבסי׃ ס

(BHSCO) 2 Samuel 24 : 17 ויאמר דוד אל־יהוה בראתו את־המלאך המכה בעם ויאמר הנה אנכי חטאתי ואנכי העויתי ואלה הצאן מה עשו תהי נא ידך בי ובבית אבי׃ ף

(BHSCO) 2 Samuel 24 : 18 ויבא־גד אל־דוד ביום ההוא ויאמר לו עלה הקם ליהוה מזבח בגרן [כ ארניה] [ק ארונה] היבסי׃

(BHSCO) 2 Samuel 24 : 19 ויעל דוד כדבר־גד כאשר צוה יהוה׃

(BHSCO) 2 Samuel 24 : 20 וישקף ארונה וירא את־המלך ואת־עבדיו עברים עליו ויצא ארונה וישתחו למלך אפיו ארצה׃

(BHSCO) 2 Samuel 24 : 21 ויאמר ארונה מדוע בא אדני־המלך אל־עבדו ויאמר דוד לקנות מעמך את־הגרן לבנות מזבח ליהוה ותעצר המגפה מעל העם׃

(BHSCO) 2 Samuel 24 : 22 ויאמר ארונה אל־דוד יקח ויעל אדני המלך הטוב [כ בעינו] [ק בעיניו] ראה הבקר לעלה והמרגים וכלי הבקר לעצים׃

(BHSCO) 2 Samuel 24 : 23 הכל נתן ארונה המלך למלך ס ויאמר ארונה אל־המלך יהוה אלהיך ירצך׃

(BHSCO) 2 Samuel 24 : 24 ויאמר המלך אל־ארונה לא כי־קנו אקנה מאותך במחיר ולא אעלה ליהוה אלהי עלות חנם ויקן דוד את־הגרן ואת־הבקר בכסף שקלים חמשים׃

(BHSCO) 2 Samuel 24 : 25 ויבן שם דוד מזבח ליהוה ויעל עלות ושלמים ויעתר יהוה לארץ ותעצר המגפה מעל ישראל׃