(BHSCO) 2 Samuel 9 : 1 ויאמר דוד הכי יש־עוד אשר נותר לבית שאול ואעשה עמו חסד בעבור יהונתן׃
(BHSCO) 2 Samuel 9 : 2 ולבית שאול עבד ושמו ציבא ויקראו־לו אל־דוד ויאמר המלך אליו האתה ציבא ויאמר עבדך׃
(BHSCO) 2 Samuel 9 : 3 ויאמר המלך האפס עוד איש לבית שאול ואעשה עמו חסד אלהים ויאמר ציבא אל־המלך עוד בן ליהונתן נכה רגלים׃
(BHSCO) 2 Samuel 9 : 4 ויאמר־לו המלך איפה הוא ויאמר ציבא אל־המלך הנה־הוא בית מכיר בן־עמיאל בלו דבר׃
(BHSCO) 2 Samuel 9 : 5 וישלח המלך דוד ויקחהו מבית מכיר בן־עמיאל מלו דבר׃
(BHSCO) 2 Samuel 9 : 6 ויבא מפיבשת בן־יהונתן בן־שאול אל־דוד ויפל על־פניו וישתחו ויאמר דוד מפיבשת ויאמר הנה עבדך׃
(BHSCO) 2 Samuel 9 : 7 ויאמר לו דוד אל־תירא כי עשה אעשה עמך חסד בעבור יהונתן אביך והשבתי לך את־כל־שדה שאול אביך ואתה תאכל לחם על־שלחני תמיד׃
(BHSCO) 2 Samuel 9 : 8 וישתחו ויאמר מה עבדך כי פנית אל־הכלב המת אשר כמוני׃
(BHSCO) 2 Samuel 9 : 9 ויקרא המלך אל־ציבא נער שאול ויאמר אליו כל אשר היה לשאול ולכל־ביתו נתתי לבן־אדניך׃
(BHSCO) 2 Samuel 9 : 10 ועבדת לו את־האדמה אתה ובניך ועבדיך והבאת והיה לבן־אדניך לחם ואכלו ומפיבשת בן־אדניך יאכל תמיד לחם על־שלחני ולציבא חמשה עשר בנים ועשרים עבדים׃
(BHSCO) 2 Samuel 9 : 11 ויאמר ציבא אל־המלך ככל אשר יצוה אדני המלך את־עבדו כן יעשה עבדך ומפיבשת אכל על־שלחני כאחד מבני המלך׃
(BHSCO) 2 Samuel 9 : 12 ולמפיבשת בן־קטן ושמו מיכא וכל מושב בית־ציבא עבדים למפיבשת׃
(BHSCO) 2 Samuel 9 : 13 ומפיבשת ישב בירושלם כי על־שלחן המלך תמיד הוא אכל והוא פסח שתי רגליו׃ ף