(BHSCO) Psalms 106 : 1 הללויה הודו ליהוה כי־טוב כי לעולם חסדו׃
(BHSCO) Psalms 106 : 2 מי ימלל גבורות יהוה ישמיע כל־תהלתו׃
(BHSCO) Psalms 106 : 3 אשרי שמרי משפט עשה צדקה בכל־עת׃
(BHSCO) Psalms 106 : 4 זכרני יהוה ברצון עמך פקדני בישועתך׃
(BHSCO) Psalms 106 : 5 לראות בטובת בחיריך לשמח בשמחת גויך להתהלל עם־נחלתך׃
(BHSCO) Psalms 106 : 6 חטאנו עם־אבותינו העוינו הרשענו׃
(BHSCO) Psalms 106 : 7 אבותינו במצרים לא־השכילו נפלאותיך לא זכרו את־רב חסדיך וימרו על־ים בים־סוף׃
(BHSCO) Psalms 106 : 8 ויושיעם למען שמו להודיע את־גבורתו׃
(BHSCO) Psalms 106 : 9 ויגער בים־סוף ויחרב ויוליכם בתהמות כמדבר׃
(BHSCO) Psalms 106 : 10 ויושיעם מיד שונא ויגאלם מיד אויב׃
(BHSCO) Psalms 106 : 11 ויכסו־מים צריהם אחד מהם לא נותר׃
(BHSCO) Psalms 106 : 12 ויאמינו בדבריו ישירו תהלתו׃
(BHSCO) Psalms 106 : 13 מהרו שכחו מעשיו לא־חכו לעצתו׃
(BHSCO) Psalms 106 : 14 ויתאוו תאוה במדבר וינסו־אל בישימון׃
(BHSCO) Psalms 106 : 15 ויתן להם שאלתם וישלח רזון בנפשם׃
(BHSCO) Psalms 106 : 16 ויקנאו למשה במחנה לאהרן קדוש יהוה׃
(BHSCO) Psalms 106 : 17 תפתח־ארץ ותבלע דתן ותכס על־עדת אבירם׃
(BHSCO) Psalms 106 : 18 ותבער־אש בעדתם להבה תלהט רשעים׃
(BHSCO) Psalms 106 : 19 יעשו־עגל בחרב וישתחוו למסכה׃
(BHSCO) Psalms 106 : 20 וימירו את־כבודם בתבנית שור אכל עשב׃
(BHSCO) Psalms 106 : 21 שכחו אל מושיעם עשה גדלות במצרים׃
(BHSCO) Psalms 106 : 22 נפלאות בארץ חם נוראות על־ים־סוף׃
(BHSCO) Psalms 106 : 23 ויאמר להשמידם לולי משה בחירו עמד בפרץ לפניו להשיב חמתו מהשחית׃
(BHSCO) Psalms 106 : 24 וימאסו בארץ חמדה לא־האמינו לדברו׃
(BHSCO) Psalms 106 : 25 וירגנו באהליהם לא שמעו בקול יהוה׃
(BHSCO) Psalms 106 : 26 וישא ידו להם להפיל אותם במדבר׃
(BHSCO) Psalms 106 : 27 ולהפיל זרעם בגוים ולזרותם בארצות׃
(BHSCO) Psalms 106 : 28 ויצמדו לבעל פעור ויאכלו זבחי מתים׃
(BHSCO) Psalms 106 : 29 ויכעיסו במעלליהם ותפרץ־בם מגפה׃
(BHSCO) Psalms 106 : 30 ויעמד פינחס ויפלל ותעצר המגפה׃
(BHSCO) Psalms 106 : 31 ותחשב לו לצדקה לדר ודר עד־עולם׃
(BHSCO) Psalms 106 : 32 ויקציפו על־מי מריבה וירע למשה בעבורם׃
(BHSCO) Psalms 106 : 33 כי־המרו את־רוחו ויבטא בשפתיו׃
(BHSCO) Psalms 106 : 34 לא־השמידו את־העמים אשר אמר יהוה להם׃
(BHSCO) Psalms 106 : 35 ויתערבו בגוים וילמדו מעשיהם׃
(BHSCO) Psalms 106 : 36 ויעבדו את־עצביהם ויהיו להם למוקש׃
(BHSCO) Psalms 106 : 37 ויזבחו את־בניהם ואת־בנותיהם לשדים׃
(BHSCO) Psalms 106 : 38 וישפכו דם נקי דם־בניהם ובנותיהם אשר זבחו לעצבי כנען ותחנף הארץ בדמים׃
(BHSCO) Psalms 106 : 39 ויטמאו במעשיהם ויזנו במעלליהם׃
(BHSCO) Psalms 106 : 40 ויחר־אף יהוה בעמו ויתעב את־נחלתו׃
(BHSCO) Psalms 106 : 41 ויתנם ביד־גוים וימשלו בהם שנאיהם׃
(BHSCO) Psalms 106 : 42 וילחצום אויביהם ויכנעו תחת ידם׃
(BHSCO) Psalms 106 : 43 פעמים רבות יצילם והמה ימרו בעצתם וימכו בעונם׃
(BHSCO) Psalms 106 : 44 וירא בצר להם בשמעו את־רנתם׃
(BHSCO) Psalms 106 : 45 ויזכר להם בריתו וינחם כרב [כ חסדו] [ק חסדיו]׃
(BHSCO) Psalms 106 : 46 ויתן אותם לרחמים לפני כל־שוביהם׃
(BHSCO) Psalms 106 : 47 הושיענו יהוה אלהינו וקבצנו מן־הגוים להדות לשם קדשך להשתבח בתהלתך׃
(BHSCO) Psalms 106 : 48 ברוך־יהוה אלהי ישראל מן־העולם ועד העולם ואמר כל־העם אמן הללו־יה׃