BHSCO - Ps 48

(BHSCO) Psalms 48 : 1 שיר מזמור לבני־קרח׃ גדול יהוה ומהלל מאד בעיר אלהינו הר־קדשו׃

(BHSCO) Psalms 48 : 2 יפה נוף משוש כל־הארץ הר־ציון ירכתי צפון קרית מלך רב׃

(BHSCO) Psalms 48 : 3 אלהים בארמנותיה נודע למשגב׃

(BHSCO) Psalms 48 : 4 כי־הנה המלכים נועדו עברו יחדו׃

(BHSCO) Psalms 48 : 5 המה ראו כן תמהו נבהלו נחפזו׃

(BHSCO) Psalms 48 : 6 רעדה אחזתם שם חיל כיולדה׃

(BHSCO) Psalms 48 : 7 ברוח קדים תשבר אניות תרשיש׃

(BHSCO) Psalms 48 : 8 כאשר שמענו כן ראינו בעיר־יהוה צבאות בעיר אלהינו אלהים יכוננה עד־עולם סלה׃

(BHSCO) Psalms 48 : 9 דמינו אלהים חסדך בקרב היכלך׃

(BHSCO) Psalms 48 : 10 כשמך אלהים כן תהלתך על־קצוי־ארץ צדק מלאה ימינך׃

(BHSCO) Psalms 48 : 11 ישמח הר־ציון תגלנה בנות יהודה למען משפטיך׃

(BHSCO) Psalms 48 : 12 סבו ציון והקיפוה ספרו מגדליה׃

(BHSCO) Psalms 48 : 13 שיתו לבכם לחילה פסגו ארמנותיה למען תספרו לדור אחרון׃

(BHSCO) Psalms 48 : 14 כי זה אלהים אלהינו עולם ועד הוא ינהגנו על־מות׃