(BHSCO) Psalms 7 : 1 שגיון לדוד אשר־שר ליהוה על־דברי־כוש בן־ימיני׃ יהוה אלהי בך חסיתי הושיעני מכל־רדפי והצילני׃
(BHSCO) Psalms 7 : 2 פן־יטרף כאריה נפשי פרק ואין מציל׃
(BHSCO) Psalms 7 : 3 יהוה אלהי אם־עשיתי זאת אם־יש־עול בכפי׃
(BHSCO) Psalms 7 : 4 אם־גמלתי שולמי רע ואחלצה צוררי ריקם׃
(BHSCO) Psalms 7 : 5 ירדף אויב נפשי וישג וירמס לארץ חיי וכבודי לעפר ישכן סלה׃
(BHSCO) Psalms 7 : 6 קומה יהוה באפך הנשא בעברות צוררי ועורה אלי משפט צוית׃
(BHSCO) Psalms 7 : 7 ועדת לאמים תסובבך ועליה למרום שובה׃
(BHSCO) Psalms 7 : 8 יהוה ידין עמים שפטני יהוה כצדקי וכתמי עלי׃
(BHSCO) Psalms 7 : 9 יגמר־נא רע רשעים ותכוןן צדיק ובחן לבות וכליות אלהים צדיק׃
(BHSCO) Psalms 7 : 10 מגני על־אלהים מושיע ישרי־לב׃
(BHSCO) Psalms 7 : 11 אלהים שופט צדיק ואל זעם בכל־יום׃
(BHSCO) Psalms 7 : 12 אם־לא ישוב חרבו ילטוש קשתו דרך ויכוננה׃
(BHSCO) Psalms 7 : 13 ולו הכין כלי־מות חציו לדלקים יפעל׃
(BHSCO) Psalms 7 : 14 הנה יחבל־און והרה עמל וילד שקר׃
(BHSCO) Psalms 7 : 15 בור כרה ויחפרהו ויפל בשחת יפעל׃
(BHSCO) Psalms 7 : 16 ישוב עמלו בראשו ועל קדקדו חמסו ירד׃
(BHSCO) Psalms 7 : 17 אודה יהוה כצדקו ואזמרה שם־יהוה עליון׃