(BHSCO) Psalms 94 : 1 אל־נקמות יהוה אל נקמות הופיע׃
(BHSCO) Psalms 94 : 2 הנשא שפט הארץ השב גמול על־גאים׃
(BHSCO) Psalms 94 : 3 עד־מתי רשעים יהוה עד־מתי רשעים יעלזו׃
(BHSCO) Psalms 94 : 4 יביעו ידברו עתק יתאמרו כל־פעלי און׃
(BHSCO) Psalms 94 : 5 עמך יהוה ידכאו ונחלתך יענו׃
(BHSCO) Psalms 94 : 6 אלמנה וגר יהרגו ויתומים ירצחו׃
(BHSCO) Psalms 94 : 7 ויאמרו לא יראה־יה ולא־יבין אלהי יעקב׃
(BHSCO) Psalms 94 : 8 בינו בערים בעם וכסילים מתי תשכילו׃
(BHSCO) Psalms 94 : 9 הנטע אזן הלא ישמע אם־יצר עין הלא יביט׃
(BHSCO) Psalms 94 : 10 היסר גוים הלא יוכיח המלמד אדם דעת׃
(BHSCO) Psalms 94 : 11 יהוה ידע* מחשבות אדם כי־המה הבל׃
(BHSCO) Psalms 94 : 12 אשרי הגבר אשר־תיסרנו יה ומתורתך תלמדנו׃
(BHSCO) Psalms 94 : 13 להשקיט לו מימי רע עד יכרה לרשע שחת׃
(BHSCO) Psalms 94 : 14 כי לא־יטש יהוה עמו ונחלתו לא יעזב׃
(BHSCO) Psalms 94 : 15 כי־עד־צדק ישוב משפט ואחריו כל־ישרי־לב׃
(BHSCO) Psalms 94 : 16 מי־יקום לי עם־מרעים מי־יתיצב לי עם־פעלי און׃
(BHSCO) Psalms 94 : 17 לולי יהוה עזרתה לי כמעט שכנה דומה נפשי׃
(BHSCO) Psalms 94 : 18 אם־אמרתי מטה רגלי חסדך יהוה יסעדני׃
(BHSCO) Psalms 94 : 19 ברב שרעפי בקרבי תנחומיך ישעשעו נפשי׃
(BHSCO) Psalms 94 : 20 היחברך כסא הוות יצר עמל עלי־חק׃
(BHSCO) Psalms 94 : 21 יגודו על־נפש צדיק ודם נקי ירשיעו׃
(BHSCO) Psalms 94 : 22 ויהי יהוה לי למשגב ואלהי לצור מחסי׃
(BHSCO) Psalms 94 : 23 וישב עליהם את־אונם וברעתם יצמיתם יצמיתם יהוה אלהינו׃