BHSCO - Ps 30

(BHSCO) Psalms 30 : 1 מזמור שיר־חנכת הבית לדוד׃ ארוממך יהוה כי דליתני ולא־שמחת איבי לי׃

(BHSCO) Psalms 30 : 2 יהוה אלהי שועתי אליך ותרפאני׃

(BHSCO) Psalms 30 : 3 יהוה העלית מן־שאול נפשי חייתני [כ מיורדי] [ק מירדי]־בור׃

(BHSCO) Psalms 30 : 4 זמרו ליהוה חסידיו והודו לזכר קדשו׃

(BHSCO) Psalms 30 : 5 כי רגע באפו חיים ברצונו בערב ילין בכי ולבקר רנה׃

(BHSCO) Psalms 30 : 6 ואני אמרתי בשלוי בל־אמוט לעולם׃

(BHSCO) Psalms 30 : 7 יהוה ברצונך העמדתה להררי עז הסתרת פניך הייתי נבהל׃

(BHSCO) Psalms 30 : 8 אליך יהוה אקרא ואל־אדני אתחןן׃

(BHSCO) Psalms 30 : 9 מה־בצע בדמי ברדתי אל־שחת היודך עפר היגיד אמתך׃

(BHSCO) Psalms 30 : 10 שמע־יהוה וחנני יהוה היה־עזר לי׃

(BHSCO) Psalms 30 : 11 הפכת מספדי למחול לי פתחת שקי ותאזרני שמחה׃

(BHSCO) Psalms 30 : 12 למען יזמרך כבוד ולא ידם יהוה אלהי לעולם אודך׃