(BHSCO) Psalms 76 : 1 למנצח בנגינת מזמור לאסף שיר׃ נודע ביהודה אלהים בישראל גדול שמו׃
(BHSCO) Psalms 76 : 2 ויהי בשלם סכו ומעונתו בציון׃
(BHSCO) Psalms 76 : 3 שמה שבר רשפי־קשת מגן וחרב ומלחמה סלה׃
(BHSCO) Psalms 76 : 4 נאור אתה אדיר מהררי־טרף׃
(BHSCO) Psalms 76 : 5 אשתוללו אבירי לב נמו שנתם ולא־מצאו כל־אנשי־חיל ידיהם׃
(BHSCO) Psalms 76 : 6 מגערתך אלהי יעקב נרדם ורכב וסוס׃
(BHSCO) Psalms 76 : 7 אתה נורא אתה ומי־יעמד לפניך מאז אפך׃
(BHSCO) Psalms 76 : 8 משמים השמעת דין ארץ יראה ושקטה׃
(BHSCO) Psalms 76 : 9 בקום־למשפט אלהים להושיע כל־ענוי־ארץ סלה׃
(BHSCO) Psalms 76 : 10 כי־חמת אדם תודך שארית חמת תחגר׃
(BHSCO) Psalms 76 : 11 נדרו ושלמו ליהוה אלהיכם כל־סביביו יובילו שי למורא׃
(BHSCO) Psalms 76 : 12 יבצר רוח נגידים נורא למלכי־ארץ׃