BHSCO - Ps 18

(BHSCO) Psalms 18 : 1 למנצח לעבד יהוה לדוד אשר דבר ליהוה את־דברי השירה הזאת ביום הציל־יהוה אותו מכף כל־איביו ומיד שאול׃ ויאמר ארחמך יהוה חזקי׃

(BHSCO) Psalms 18 : 2 יהוה סלעי ומצודתי ומפלטי אלי צורי אחסה־בו מגני וקרן־ישעי משגבי׃

(BHSCO) Psalms 18 : 3 מהלל אקרא יהוה ומן־איבי אושע׃

(BHSCO) Psalms 18 : 4 אפפוני חבלי־מות ונחלי בליעל יבעתוני׃

(BHSCO) Psalms 18 : 5 חבלי שאול סבבוני קדמוני מוקשי מות׃

(BHSCO) Psalms 18 : 6 בצר־לי אקרא יהוה ואל־אלהי אשוע ישמע מהיכלו קולי ושועתי לפניו תבוא באזניו׃

(BHSCO) Psalms 18 : 7 ותגעש ותרעש הארץ ומוסדי הרים ירגזו ויתגעשו כי־חרה לו׃

(BHSCO) Psalms 18 : 8 עלה עשן באפו ואש־מפיו תאכל גחלים בערו ממנו׃

(BHSCO) Psalms 18 : 9 ויט שמים וירד וערפל תחת רגליו׃

(BHSCO) Psalms 18 : 10 וירכב על־כרוב ויעף וידא על־כנפי־רוח׃

(BHSCO) Psalms 18 : 11 ישת חשך סתרו סביבותיו סכתו חשכת־מים עבי שחקים׃

(BHSCO) Psalms 18 : 12 מנגה נגדו עביו עברו ברד וגחלי־אש׃

(BHSCO) Psalms 18 : 13 וירעם בשמים יהוה ועליון יתן קלו ברד וגחלי־אש׃

(BHSCO) Psalms 18 : 14 וישלח חציו ויפיצם וברקים רב ויהםם׃

(BHSCO) Psalms 18 : 15 ויראו אפיקי מים ויגלו מוסדות תבל מגערתך יהוה מנשמת רוח אפך׃

(BHSCO) Psalms 18 : 16 ישלח ממרום יקחני ימשני ממים רבים׃

(BHSCO) Psalms 18 : 17 יצילני מאיבי עז ומשנאי כי־אמצו ממני׃

(BHSCO) Psalms 18 : 18 יקדמוני ביום־אידי ויהי־יהוה למשען לי׃

(BHSCO) Psalms 18 : 19 ויוציאני למרחב יחלצני כי חפץ בי׃

(BHSCO) Psalms 18 : 20 יגמלני יהוה כצדקי כבר ידי ישיב לי׃

(BHSCO) Psalms 18 : 21 כי־שמרתי דרכי יהוה ולא־רשעתי מאלהי׃

(BHSCO) Psalms 18 : 22 כי כל־משפטיו לנגדי וחקתיו לא־אסיר מני׃

(BHSCO) Psalms 18 : 23 ואהי תמים עמו ואשתמר מעוני׃

(BHSCO) Psalms 18 : 24 וישב־יהוה לי כצדקי כבר ידי לנגד עיניו׃

(BHSCO) Psalms 18 : 25 עם־חסיד תתחסד עם־גבר תמים תתםם׃

(BHSCO) Psalms 18 : 26 עם־נבר תתברר ועם־עקש תתפתל׃

(BHSCO) Psalms 18 : 27 כי־אתה עם־עני תושיע ועינים רמות תשפיל׃

(BHSCO) Psalms 18 : 28 כי־אתה תאיר נרי יהוה אלהי יגיה חשכי׃

(BHSCO) Psalms 18 : 29 כי־בך ארץ גדוד ובאלהי אדלג־שור׃

(BHSCO) Psalms 18 : 30 האל תמים דרכו אמרת־יהוה צרופה מגן הוא לכל החסים בו׃

(BHSCO) Psalms 18 : 31 כי מי אלוה מבלעדי יהוה ומי צור זולתי אלהינו׃

(BHSCO) Psalms 18 : 32 האל המאזרני חיל ויתן תמים דרכי׃

(BHSCO) Psalms 18 : 33 משוה רגלי כאילות ועל במתי יעמידני׃

(BHSCO) Psalms 18 : 34 מלמד ידי למלחמה ונחתה קשת־נחושה זרועתי׃

(BHSCO) Psalms 18 : 35 ותתן־לי מגן ישעך וימינך תסעדני וענותך תרבני׃

(BHSCO) Psalms 18 : 36 תרחיב צעדי תחתי ולא מעדו קרסלי׃

(BHSCO) Psalms 18 : 37 ארדוף אויבי ואשיגם ולא־אשוב עד־כלותם׃

(BHSCO) Psalms 18 : 38 אמחצם ולא־יכלו קום יפלו תחת רגלי׃

(BHSCO) Psalms 18 : 39 ותאזרני חיל למלחמה תכריע קמי תחתי׃

(BHSCO) Psalms 18 : 40 ואיבי נתתה לי ערף ומשנאי אצמיתם׃

(BHSCO) Psalms 18 : 41 ישועו ואין־מושיע על־יהוה ולא ענם׃

(BHSCO) Psalms 18 : 42 ואשחקם כעפר על־פני־רוח כטיט חוצות אריקם׃

(BHSCO) Psalms 18 : 43 תפלטני מריבי עם תשימני לראש גוים עם לא־ידעתי יעבדוני׃

(BHSCO) Psalms 18 : 44 לשמע אזן ישמעו לי בני־נכר יכחשו־לי׃

(BHSCO) Psalms 18 : 45 בני־נכר יבלו ויחרגו ממסגרותיהם׃

(BHSCO) Psalms 18 : 46 חי־יהוה וברוך צורי וירום אלוהי ישעי׃

(BHSCO) Psalms 18 : 47 האל הנותן נקמות לי וידבר עמים תחתי׃

(BHSCO) Psalms 18 : 48 מפלטי מאיבי אף מן־קמי תרוממני מאיש חמס תצילני׃

(BHSCO) Psalms 18 : 49 על־כן אודך בגוים יהוה ולשמך אזמרה׃

(BHSCO) Psalms 18 : 50 [כ מגדל] [ק מגדיל] ישועות מלכו ועשה חסד למשיחו לדוד ולזרעו עד־עולם׃