(BHSCO) Psalms 38 : 1 מזמור לדוד להזכיר׃ יהוה אל־בקצפך תוכיחני ובחמתך תיסרני׃
(BHSCO) Psalms 38 : 2 כי־חציך נחתו בי ותנחת עלי ידך׃
(BHSCO) Psalms 38 : 3 אין־מתם בבשרי מפני זעמך אין־שלום בעצמי מפני חטאתי׃
(BHSCO) Psalms 38 : 4 כי עונתי עברו ראשי כמשא כבד יכבדו ממני׃
(BHSCO) Psalms 38 : 5 הבאישו נמקו חבורתי מפני אולתי׃
(BHSCO) Psalms 38 : 6 נעויתי שחתי עד־מאד כל־היום קדר הלכתי׃
(BHSCO) Psalms 38 : 7 כי־כסלי מלאו נקלה ואין מתם בבשרי׃
(BHSCO) Psalms 38 : 8 נפוגותי ונדכיתי עד־מאד שאגתי מנהמת לבי׃
(BHSCO) Psalms 38 : 9 אדני נגדך כל־תאותי ואנחתי ממך לא־נסתרה׃
(BHSCO) Psalms 38 : 10 לבי סחרחר עזבני כחי ואור־עיני גם־הם אין אתי׃
(BHSCO) Psalms 38 : 11 אהבי ורעי מנגד נגעי יעמדו וקרובי מרחק עמדו׃
(BHSCO) Psalms 38 : 12 וינקשו מבקשי נפשי ודרשי רעתי דברו הוות ומרמות כל־היום יהגו׃
(BHSCO) Psalms 38 : 13 ואני כחרש לא אשמע וכאלם לא יפתח־פיו׃
(BHSCO) Psalms 38 : 14 ואהי כאיש אשר לא־שמע ואין בפיו תוכחות׃
(BHSCO) Psalms 38 : 15 כי־לך יהוה הוחלתי אתה תענה אדני אלהי׃
(BHSCO) Psalms 38 : 16 כי־אמרתי פן־ישמחו־לי במוט רגלי עלי הגדילו׃
(BHSCO) Psalms 38 : 17 כי־אני לצלע נכון ומכאובי נגדי תמיד׃
(BHSCO) Psalms 38 : 18 כי־עוני אגיד אדאג מחטאתי׃
(BHSCO) Psalms 38 : 19 ואיבי חיים עצמו ורבו שנאי שקר׃
(BHSCO) Psalms 38 : 20 ומשלמי רעה תחת טובה ישטנוני תחת [כ רדופי] [ק רדפי]־טוב׃
(BHSCO) Psalms 38 : 21 אל־תעזבני יהוה אלהי אל־תרחק ממני׃
(BHSCO) Psalms 38 : 22 חושה לעזרתי אדני תשועתי׃