(BHSCO) Psalms 32 : 1 לדוד משכיל אשרי נשוי־פשע כסוי חטאה׃
(BHSCO) Psalms 32 : 2 אשרי אדם לא יחשב יהוה לו עון ואין ברוחו רמיה׃
(BHSCO) Psalms 32 : 3 כי־החרשתי בלו עצמי בשאגתי כל־היום׃
(BHSCO) Psalms 32 : 4 כי יוםם ולילה תכבד עלי ידך נהפך לשדי בחרבני קיץ סלה׃
(BHSCO) Psalms 32 : 5 חטאתי אודיעך ועוני לא־כסיתי אמרתי אודה עלי פשעי ליהוה ואתה נשאת עון חטאתי סלה׃
(BHSCO) Psalms 32 : 6 על־זאת יתפלל כל־חסיד אליך לעת מצא רק לשטף מים רבים אליו לא יגיעו׃
(BHSCO) Psalms 32 : 7 אתה סתר לי מצר תצרני רני פלט תסובבני סלה׃
(BHSCO) Psalms 32 : 8 אשכילך ואורך בדרך־זו תלך איעצה עליך עיני׃
(BHSCO) Psalms 32 : 9 אל־תהיו כסוס כפרד אין הבין במתג־ורסן עדיו לבלום בל קרב אליך׃
(BHSCO) Psalms 32 : 10 רבים מכאובים לרשע והבוטח ביהוה חסד יסובבנו׃
(BHSCO) Psalms 32 : 11 שמחו ביהוה וגילו צדיקים והרנינו כל־ישרי־לב׃