(BHSCO) Psalms 144 : 1 לדוד ברוך יהוה צורי המלמד ידי לקרב אצבעותי למלחמה׃
(BHSCO) Psalms 144 : 2 חסדי ומצודתי משגבי ומפלטי לי מגני ובו חסיתי הרודד עמי תחתי׃
(BHSCO) Psalms 144 : 3 יהוה מה־אדם ותדעהו בן־אנוש ותחשבהו׃
(BHSCO) Psalms 144 : 4 אדם להבל דמה ימיו כצל עובר׃
(BHSCO) Psalms 144 : 5 יהוה הט־שמיך ותרד גע בהרים ויעשנו׃
(BHSCO) Psalms 144 : 6 ברוק ברק ותפיצם שלח חציך ותהםם׃
(BHSCO) Psalms 144 : 7 שלח ידיך ממרום פצני והצילני ממים רבים מיד בני נכר׃
(BHSCO) Psalms 144 : 8 אשר פיהם דבר־שוא וימינם ימין שקר׃
(BHSCO) Psalms 144 : 9 אלהים שיר חדש אשירה לך בנבל עשור אזמרה־לך׃
(BHSCO) Psalms 144 : 10 הנותן תשועה למלכים הפוצה את־דוד עבדו מחרב רעה׃
(BHSCO) Psalms 144 : 11 פצני והצילני מיד בני־נכר אשר פיהם דבר־שוא וימינם ימין שקר׃
(BHSCO) Psalms 144 : 12 אשר בנינו כנטעים מגדלים בנעוריהם בנותינו כזוית מחטבות תבנית היכל׃
(BHSCO) Psalms 144 : 13 מזוינו מלאים מפיקים מזן אל־זן צאוננו מאליפות מרבבות בחוצותינו׃
(BHSCO) Psalms 144 : 14 אלופינו מסבלים אין־פרץ ואין יוצאת ואין צוחה ברחבתינו׃
(BHSCO) Psalms 144 : 15 אשרי העם שככה לו אשרי העם שיהוה אלהיו׃