(BHSCO) Psalms 62 : 1 למנצח על־ידותון מזמור לדוד׃ אך אל־אלהים דומיה נפשי ממנו ישועתי׃
(BHSCO) Psalms 62 : 2 אך־הוא צורי וישועתי משגבי לא־אמוט רבה׃
(BHSCO) Psalms 62 : 3 עד־אנה תהותתו על־איש תרצחו כלכם כקיר נטוי גדר הדחויה׃
(BHSCO) Psalms 62 : 4 אך משאתו יעצו להדיח ירצו כזב בפיו יברכו ובקרבם יקללו־סלה׃
(BHSCO) Psalms 62 : 5 אך לאלהים דומי נפשי כי־ממנו תקותי׃
(BHSCO) Psalms 62 : 6 אך־הוא צורי וישועתי משגבי לא אמוט׃
(BHSCO) Psalms 62 : 7 על־אלהים ישעי וכבודי צור־עזי מחסי באלהים׃
(BHSCO) Psalms 62 : 8 בטחו בו בכל־עת עם שפכו־לפניו לבבכם אלהים מחסה־לנו סלה׃
(BHSCO) Psalms 62 : 9 אך הבל בני־אדם כזב בני איש במאזנים לעלות המה מהבל יחד׃
(BHSCO) Psalms 62 : 10 אל־תבטחו בעשק ובגזל אל־תהבלו חיל כי־ינוב אל־תשיתו לב׃
(BHSCO) Psalms 62 : 11 אחת דבר אלהים שתים־זו שמעתי כי עז לאלהים׃
(BHSCO) Psalms 62 : 12 ולך־אדני חסד כי־אתה תשלם לאיש כמעשהו׃