BHSCO - Ps 31

(BHSCO) Psalms 31 : 1 למנצח מזמור לדוד׃ בך יהוה חסיתי אל־אבושה לעולם בצדקתך פלטני׃

(BHSCO) Psalms 31 : 2 הטה אלי אזנך מהרה הצילני היה לי לצור־מעוז לבית מצודות להושיעני׃

(BHSCO) Psalms 31 : 3 כי־סלעי ומצודתי אתה ולמען שמך תנחני ותנהלני׃

(BHSCO) Psalms 31 : 4 תוציאני מרשת זו טמנו לי כי־אתה מעוזי׃

(BHSCO) Psalms 31 : 5 בידך אפקיד רוחי פדיתה אותי יהוה אל אמת׃

(BHSCO) Psalms 31 : 6 שנאתי השמרים הבלי־שוא ואני אל־יהוה בטחתי׃

(BHSCO) Psalms 31 : 7 אגילה ואשמחה בחסדך אשר ראית את־עניי ידעת בצרות נפשי׃

(BHSCO) Psalms 31 : 8 ולא הסגרתני ביד־אויב העמדת במרחב רגלי׃

(BHSCO) Psalms 31 : 9 חנני יהוה כי צר־לי עששה בכעס עיני נפשי ובטני׃

(BHSCO) Psalms 31 : 10 כי כלו ביגון חיי ושנותי באנחה כשל בעוני כחי ועצמי עששו׃

(BHSCO) Psalms 31 : 11 מכל־צררי הייתי חרפה ולשכני מאד ופחד למידעי ראי בחוץ נדדו ממני׃

(BHSCO) Psalms 31 : 12 נשכחתי כמת מלב הייתי ככלי אבד׃

(BHSCO) Psalms 31 : 13 כי שמעתי דבת רבים מגור מסביב בהוסדם יחד עלי לקחת נפשי זממו׃

(BHSCO) Psalms 31 : 14 ואני עליך בטחתי יהוה אמרתי אלהי אתה׃

(BHSCO) Psalms 31 : 15 בידך עתתי הצילני מיד־אויבי ומרדפי׃

(BHSCO) Psalms 31 : 16 האירה פניך על־עבדך הושיעני בחסדך׃

(BHSCO) Psalms 31 : 17 יהוה אל־אבושה כי קראתיך יבשו רשעים ידמו לשאול׃

(BHSCO) Psalms 31 : 18 תאלמנה* שפתי שקר הדברות על־צדיק עתק בגאוה ובוז׃

(BHSCO) Psalms 31 : 19 מה רב־טובך אשר־צפנת ליראיך פעלת לחסים בך נגד בני אדם׃

(BHSCO) Psalms 31 : 20 תסתירם בסתר פניך מרכסי איש תצפנם בסכה מריב לשנות׃

(BHSCO) Psalms 31 : 21 ברוך יהוה כי הפליא חסדו לי בעיר מצור׃

(BHSCO) Psalms 31 : 22 ואני אמרתי בחפזי נגרזתי מנגד עיניך אכן שמעת קול תחנוני בשועי אליך׃

(BHSCO) Psalms 31 : 23 אהבו את־יהוה כל־חסידיו אמונים נצר יהוה ומשלם על־יתר עשה גאוה׃

(BHSCO) Psalms 31 : 24 חזקו ויאמץ לבבכם כל־המיחלים ליהוה׃