BHSCO - Ps 41

(BHSCO) Psalms 41 : 1 למנצח מזמור לדוד׃ אשרי משכיל אל־דל ביום רעה ימלטהו יהוה׃

(BHSCO) Psalms 41 : 2 יהוה ישמרהו ויחיהו [כ יאשר] [ק ואשר] בארץ ואל־תתנהו בנפש איביו׃

(BHSCO) Psalms 41 : 3 יהוה יסעדנו על־ערש דוי כל־משכבו הפכת בחליו׃

(BHSCO) Psalms 41 : 4 אני־אמרתי יהוה חנני רפאה נפשי כי־חטאתי לך׃

(BHSCO) Psalms 41 : 5 אויבי יאמרו רע לי מתי ימות ואבד שמו׃

(BHSCO) Psalms 41 : 6 ואם־בא לראות שוא ידבר לבו יקבץ־און לו יצא לחוץ ידבר׃

(BHSCO) Psalms 41 : 7 יחד עלי יתלחשו כל־שנאי עלי יחשבו רעה לי׃

(BHSCO) Psalms 41 : 8 דבר־בליעל יצוק בו ואשר שכב לא־יוסיף לקום׃

(BHSCO) Psalms 41 : 9 גם־איש שלומי אשר־בטחתי בו אוכל לחמי הגדיל עלי עקב׃

(BHSCO) Psalms 41 : 10 ואתה יהוה חנני והקימני ואשלמה להם׃

(BHSCO) Psalms 41 : 11 בזאת ידעתי כי־חפצת בי כי לא־יריע איבי עלי׃

(BHSCO) Psalms 41 : 12 ואני בתמי תמכת בי ותציבני לפניך לעולם׃

(BHSCO) Psalms 41 : 13 ברוך יהוה אלהי ישראל מהעולם ועד העולם אמן ואמן׃