BHSCO - Ps 71

(BHSCO) Psalms 71 : 1 בך־יהוה חסיתי אל־אבושה לעולם׃

(BHSCO) Psalms 71 : 2 בצדקתך תצילני ותפלטני הטה־אלי אזנך והושיעני׃

(BHSCO) Psalms 71 : 3 היה לי לצור מעון לבוא תמיד צוית להושיעני כי־סלעי ומצודתי אתה׃

(BHSCO) Psalms 71 : 4 אלהי פלטני מיד רשע מכף מעול וחומץ׃

(BHSCO) Psalms 71 : 5 כי־אתה תקותי אדני יהוה מבטחי מנעורי׃

(BHSCO) Psalms 71 : 6 עליך נסמכתי מבטן ממעי אמי אתה גוזי בך תהלתי תמיד׃

(BHSCO) Psalms 71 : 7 כמופת הייתי לרבים ואתה מחסי־עז׃

(BHSCO) Psalms 71 : 8 ימלא פי תהלתך כל־היום תפארתך׃

(BHSCO) Psalms 71 : 9 אל־תשליכני לעת זקנה ככלות כחי אל־תעזבני׃

(BHSCO) Psalms 71 : 10 כי־אמרו אויבי לי ושמרי נפשי נועצו יחדו׃

(BHSCO) Psalms 71 : 11 לאמר אלהים עזבו רדפו ותפשוהו כי־אין מציל׃

(BHSCO) Psalms 71 : 12 אלהים אל־תרחק ממני אלהי לעזרתי [כ חישה] [ק חושה]׃

(BHSCO) Psalms 71 : 13 יבשו יכלו שטני נפשי יעטו חרפה וכלמה מבקשי רעתי׃

(BHSCO) Psalms 71 : 14 ואני תמיד איחל והוספתי על־כל־תהלתך׃

(BHSCO) Psalms 71 : 15 פי יספר צדקתך כל־היום תשועתך כי לא ידעתי ספרות׃

(BHSCO) Psalms 71 : 16 אבוא בגברות אדני יהוה אזכיר צדקתך לבדך׃

(BHSCO) Psalms 71 : 17 אלהים למדתני מנעורי ועד־הנה אגיד נפלאותיך׃

(BHSCO) Psalms 71 : 18 וגם עד־זקנה ושיבה אלהים אל־תעזבני עד־אגיד זרועך לדור לכל־יבוא גבורתך׃

(BHSCO) Psalms 71 : 19 וצדקתך אלהים עד־מרום אשר־עשית גדלות אלהים מי כמוך׃

(BHSCO) Psalms 71 : 20 אשר [כ הראיתנו] [ק הראיתני] צרות רבות ורעות תשוב [כ תחיינו] [ק תחייני] ומתהמות הארץ תשוב תעלני׃

(BHSCO) Psalms 71 : 21 תרב גדלתי ותסב תנחמני׃

(BHSCO) Psalms 71 : 22 גם־אני אודך בכלי־נבל אמתך אלהי אזמרה לך בכנור קדוש ישראל׃

(BHSCO) Psalms 71 : 23 תרננה שפתי כי אזמרה־לך ונפשי אשר פדית׃

(BHSCO) Psalms 71 : 24 גם־לשוני כל־היום תהגה צדקתך כי־בשו כי־חפרו מבקשי רעתי׃