BHSCO - Ps 17

(BHSCO) Psalms 17 : 1 תפלה לדוד שמעה יהוה צדק הקשיבה רנתי האזינה תפלתי בלא שפתי מרמה׃

(BHSCO) Psalms 17 : 2 מלפניך משפטי יצא עיניך תחזינה מישרים׃

(BHSCO) Psalms 17 : 3 בחנת לבי פקדת לילה צרפתני בל־תמצא זמתי בל־יעבר־פי׃

(BHSCO) Psalms 17 : 4 לפעלות אדם בדבר שפתיך אני שמרתי ארחות פריץ׃

(BHSCO) Psalms 17 : 5 תמך אשרי במעגלותיך בל־נמוטו* פעמי׃

(BHSCO) Psalms 17 : 6 אני־קראתיך כי־תענני אל הט־אזנך לי שמע אמרתי׃

(BHSCO) Psalms 17 : 7 הפלה חסדיך מושיע חוסים ממתקוממים בימינך׃

(BHSCO) Psalms 17 : 8 שמרני כאישון בת־עין בצל כנפיך תסתירני׃

(BHSCO) Psalms 17 : 9 מפני רשעים זו שדוני איבי בנפש יקיפו עלי׃

(BHSCO) Psalms 17 : 10 חלבמו סגרו פימו דברו בגאות׃

(BHSCO) Psalms 17 : 11 אשרינו עתה [כ סבבוני] [ק סבבונו] עיניהם ישיתו לנטות בארץ׃

(BHSCO) Psalms 17 : 12 דמינו כאריה יכסוף לטרוף וככפיר ישב במסתרים׃

(BHSCO) Psalms 17 : 13 קומה יהוה קדמה פניו הכריעהו פלטה נפשי מרשע חרבך׃

(BHSCO) Psalms 17 : 14 ממתים ידך יהוה ממתים מחלד חלקם בחיים [כ וצפינך] [ק וצפונך] תמלא בטנם ישבעו בנים והניחו יתרם לעולליהם׃

(BHSCO) Psalms 17 : 15 אני בצדק אחזה פניך אשבעה בהקיץ תמונתך׃